सत्तापक्षलाई माओवादीले भन्यो- तपाईँहरूले रास्वपा र राप्रपालाई गाली गरेको कुरा जनताले पत्याइदिनुपर्ने ?

काठमाडौं । नेकपा माओवादी केन्द्रले रास्वपा र राप्रपासँग वार्ता गर्न सरकारलाई आग्रह गरेको छ । प्रतिनिधि सभाको बैठकमा बोल्दै सांसद माधव सापकोटाले महिनौँसम्म सदन बहिस्कार गर्दा पनि वार्ता नगरेको भन्दै असन्तुष्टि जनाए ।

उनले भने, ‘समाजमा प्रियतावादीहरू हुन्छन्, तर उनीहरूलाई गाली गरेर सरापेर के फाइदा छ । रास्वपा र राप्रपाका सांसदहरूले जे गरिराख्नुभएको छ । त्यो मिलेको छैन । तर लोकतन्त्र भनेको यही हो ? महिनौँसम्म दुई पार्टीले बहिस्कार गरेर बाहिर जाने, एक पटक बोलाएर संवादसम्म नगर्ने के कुरा हो ? भनेर छलफल नगर्ने । तिनीहरूलाई यहाँ गाली गरेर जनताले पत्याइदिनुपर्ने? कसैले पत्याउँदैनन् ।’

उनले सरकारले आर्थिक सुधार, सुशासन र संविधान संशोधनको एजेन्डा अघि सारेको भएपनि अहिलेसम्म केही नभएको दाबी गरे । उनले सरकारमा रहेका मन्त्रीहरू नै भ्रष्टाचार काण्डमा पर्दा पनि संरक्षण गरिरहेको आरोप लगाए ।

लिची बारी घुस काण्डमा मुछिएका भूमि मन्त्री बलराम अधिकारीलाई नेतृत्वले नै संरक्षण गरिरहेको दाबी गरे ।