‘बलिदान’ मा निर्देशक सेन आफैँ कलाकार, चिन्नै नसकिने हुलिया

काठमाडौं । वडा दसैँको अवसर पारेर फूलपातीबाट रिलिजको तयारीमा रहेको चलचित्र ‘बलिदान’ को एकैपटक चारवटा पोस्टर सार्वजनिक भएको छ। निर्माण टिमले आफ्नो प्रचारप्रसार अभियानलाई थप सशक्त बनाउँदै एकैपटक ४ मुख्य पात्रहरूको क्यारेक्टर पोस्टर सार्वजनिक गरेको हो।

यसमा रोचक के छ भने, सार्वजनिक पोस्टरमध्ये एउटामा निर्देशक सन्तोष सेन आफैँ छन् । उनले अरु कलाकारसंगको पोस्टरसंगै आफ्नो एक छुट्टै पोस्टर पनि सार्वजनिक गरेका हुन। पोस्टरमा उनी चिन्नै नसकिने हुलियामा छन् । पोस्टर झट्ट हेर्दा पहिलो नजरमा उनलाई चिन्नै गाह्रो पर्छ। यसअघि उनले कहिले आफू यो चलचित्रमा कलाकारको रुपैँया रहेको जिकिर गरेका थिएनन् । एकैचोटि उनले पोस्टर सार्वजनिक गर्दै आफू चलचित्रमा रहेको जानकारी दिएका हुन।

सेनका अनुसार चलचित्रमा निभाएको उनको पात्रले समाजलाई परिभाषित गरेको छ। उनले चलचित्रमा आफ्नो भुमिकाबारे भने खुलाएका छैनन् ।

बुधवार सार्वजनिक गरिएको अन्य तीन पोस्टरमा अभिनेता अर्पण थापा, अभिनेत्री ऋचा शर्मा र अभिनेता हेमन्त बुढाथोकी फिचर्ड छन् । टिजर सार्वजनिक हुनुअघि चलचित्रका केही विशेष पात्रहरूको गहिरो प्रभाव छोड्ने अनुहारलाई दर्शकसामु पस्किएको सेनको भनाई छ। यी तस्बिरहरू केवल पोस्टर नभई समाजका कुनाकाप्चामा लुकेको आवाज भएको सेन बताउँछन् ।

सन्तोस सेनको निर्देशन र आसुसेन फिल्म्स् प्रा.लि. को प्रस्तुति रहेको चलचित्रमा निर्माता पवन ब्राडफोर्ड बिस्टको लगानी छ।