हेटौँडा । बागमती प्रदेशमा नेपाली कांग्रेसका संसदीय दलका नेता इन्द्रबहादुर बानियाँ आज मुख्यमन्त्री नियुक्त हुँदैछन् ।
दिउँसो ३ बजे मुख्यमन्त्री नियुक्त हुने र ४ बजे शपथ लिने कार्यतालिका हुँदा कांग्रेसबाट मन्त्रीहरूको सूची तयार पार्न हम्मे भएको छ ।
निवर्तमान मुख्यमन्त्री बहादुर सिंह लामाले अल्पमतमा परेपछि गरेको ३ मन्त्री नियुक्तिमा रोकिएको शपथमा उनीहरू मन्त्री कायम रहने भनेर सहमति भएको भनिए पनि उनीहरूको आज शपथबारे कांग्रेस निधोमा पुगेको छैन । मुख्यमन्त्री र ७ मन्त्रालय भागमा परेको कांग्रेसमा बहादुर सिंह लामाका ३ मन्त्री राख्दा अरू मन्त्रीका आकांक्षी रोकिने भएकाले टुंगोमा पुग्न नसकेको हो ।
दिउँसो ४ बजे हुने शपथमा मुख्यमन्त्री बानियाँ र धादिङका शिवराज अधिकारीको शपथ हुने पक्कापक्की हुँदा बहादुर सिंह लामाले नियुक्त गरेकामध्ये कुनै एक मन्त्री र अरू केही मन्त्री थप्ने या दुई जनाको मात्रै शपथ गर्ने भन्नेबारे कांग्रेसमा छलफल छलिरहेको छ । अधिकारीलाई आन्तरिक मामिला तथा कानून मन्त्रालय दिने तयारी छ । यो मन्त्रालय नै प्रदेश सरकारको प्रवक्ता हुने प्रचलन छ ।
एमालेले पनि संसदीय दलको बैठक बसेर ६ वटा मन्त्रालयमा जाने मन्त्रीहरूको टुंगो लगाउँदैछ ।
Leave a Reply