‘जहाजैमा’बाट बाहिरिए सौगात, एड्भान्स रकम पनि फिर्ता गरे

काठमाडौं । कृषा चौलागाईंले निर्देशन गर्ने चलचित्र ‘जहाजै’बाट अभिनेता सौगात मल्ल बाहिरिएका छन् । चलचित्रबाट बाहिरिएसँगै सौगातले एड्भान्स रकम पनि निर्माण पक्षलाई फिर्ता दिएका छन् ।

सौगातका अनुसार चलचित्रमा उनको भूमिका महत्वपूर्ण थियो । निर्माण पक्षले सौगातको ज्यानमा जिम गरेर कटहरु देखिनुपर्ने, मार्सल आर्ट पनि सिक्नुपर्ने बताएका थिए । सौगातले भने, ‘पात्रका लागि मिहेनत गर्नुपर्ने भएकाले मैले तीन महिनाको समय मागेको थिएँ । तर, उहाँहरुले एक महिनामै तयार हुनु भन्नुभयो । यहीबीचमा मेरो खुट्टाको अप्रेसन गर्नुपर्ने भयो, डक्टरले २२ दिन रेस्ट गर्नु भन्नुभयो । यसपछि मैले नभ्याउने भएँ ।’

मिहेनत नगरी चलचित्र खेल्दा पात्रमाथि अन्याय हुने भएकाले आफूले रातारात निर्माण पक्षलाई जानकारी गराएको र एड्भान्स रकम फिर्ता गरेको सौगातले बताए । दशैअघि अर्को चलचित्रको सुट भएको र दशैं लगत्तै ‘कबड्डी ५’को सुटमा व्यस्त हुने भएकाले पनि ‘जहाजैमा’ चलचित्रका लागि समय निकाल्न नसकेको बताए ।

‘जहाजैमा’मा केदारप्रसाद घिमिरे ‘माग्ने बूढा’, कार्म, जापानी फिल्ममा अभिनय गर्दै आइरहेकी फिलिपिनो अभिनेत्री रुजेल इचिमिया लगायतको अभिनय रहने पक्का भइसकेको छ ।