माग्ने बुढा अभिनित चलचित्र ‘माइतीघर’को फस्टलुक सार्वजनिक, दशैँमा रिलिज

काठमाडौं । रोहित अधिकारी फिल्मस् प्रा.लि.को व्यानरमा निर्माण भएको चलचित्र ‘माइतीघर’ को फस्टलुक सार्वजनिक भएको छ। निर्माणपक्षले चलचित्रको मुख्य कलाकारहरुलाई समावेश गर्दै शुक्रबार फस्टलुक सार्वजनिक गरेको हो।

चलचित्रको फस्टलुकमा कलाकारहरुको पात्र चित्रण गर्न खोजिएको छ। पोस्टरमा उज्यालो बलिरहेको घर छ जसले माइती घरलाई चित्रण गर्न खोजेको छ। तामाङ संस्कृतिको कथालाई समेत उठान गरेको यो चलचित्रलाई निर्देशक मिलन तामाङले निर्देशन गरेका हुन।

यो चलचित्र दशैंको फूलपातिको अवसर पारेर असोजको १३ गतेबाट रिलिजमा आउँदैछ । चलचित्रमा कलाकारद्वय केदार प्रसाद घिमिरे (माग्ने बुढा), धिरज मगर, प्रकाश सपुत, उपासना सिंह ठकुरी, श्यामाश्री शेर्पा, वुद्दि तामाङ, युवराज लामा, शिशिर वाङ्देल, रजनी गुरुङ, सन्तोष शाही, फूलकुमार बमजम, संगीता थापा लगायतका कलाकारहरुको अभिनय छ ।

चलचित्रमा रविन शेरचन र धिरज तामाङको लगानी छ । ईश्वर श्रेष्ठ र निरज कटुलाल चलचित्रका कार्यकारी निर्माता हुन् । रोहित अधिकारीको प्रस्तुतिमा तयार भएको चलचित्रमा चन्द्रकुमार दोङको कथा, सुशन प्रजापतिको छायांकन, रामशरण पाठकको पटकथा तथा संवाद र सुरेन्द्र पौडेलको सम्पादन छ।