देउकी प्रथामा आधारित चलचित्र ‘मोहर’ को ‘सपना हो की विपना हो’ गीत सार्वजनिक

काठमाडौं । साउनको २३ गतेबाट रिलिजमा आउन लागेको चलचित्र ‘मोहर’ को ‘सपना हो की विपना हो, के हो जिन्दगी’ बोलको गीत सार्वजनिक भएको छ । प्रदर्शन मिति नजिकिएसंगै निर्माण टिमले शुक्रबार चलचित्रको यो गीत सार्वजनिक गरेको हो।

थानेश्वर गौतम र शान्ती श्री परियारको स्वर रहेको यो गीतमा प्रभा बर्तौलाको शब्द र थानेश्वर गौतम स्वयंको संगीत छ । सार्वजनिक गीतले चलचित्रका पात्रहरुको वियोगान्त कथा बोलेको छ । भिडियोमा चलचित्रका मुख्य पात्र पल शाह, निती शाह र बेनिशा हमाल फिचर्ड छन् ।

फिल्म मेकर्स प्रा।लिको व्यानरमा निर्माण भएको यो चलचित्रका निर्माता चुम्बन जंग शाही हुन् । ओम प्रतिकको लेखन तथा निर्देशन रहेको चलचित्रमा पल शाह, अर्जुन जंग शाही, बेनिशा हमाल, नीति शाह, मिथिला शर्मा, रविन्द्र झा, लक्ष्मी गिरी, मिस पबी, सुशील देवकोटा, लक्ष्मीनाथ तिमिल्सिना, सिद्धार्थ सिंह, दत्त पण्डित, गीता थापा, नविन खतिवडा, अर्जुन आचार्य लगायतका कलाकारहरुको मुख्य भूमिका छ ।

चलचित्रमा बाल–कलाकारको रुपमा सारा शर्माले अभिनय गरेकी छिन् । दीपेन बस्न्यातको डीओपी रहेको चलचित्रमा भूपेन्द्र अधिकारीको सम्पादन, सुरेश अधिकारी, थानेश्वर गौतम, एसडी योगीको संगीत, कुमार महर्जनको एक्सन र रामजी लामिछाने र कविराज गहतराजको कोरियोग्राफी छ । चलचित्र देउकी प्रथामा आधारित छ।