मोदीलाई जया बच्चनको प्रश्न- सिउँदो त उजाडियो, अप्रेसन सिन्दूर नाम किन राखेको ?  (भिडिओ)

काठमाडौं । भारतको समाजवादी पार्टीकी सांसद तथा वरिष्ठ अभिनेत्री जया बच्चनले नरेन्द्र मोदी सरकारप्रति आक्रामक अभिव्यक्ति दिँदै ‘अप्रेसन सिन्दूर’को नामप्रति नै आपत्ति जनाएकी छन् । पहलगाम आतंकी हमलापछि भारतले पाकिस्तानमाथि गरेको युद्धलाई अप्रेसन सिन्दूरको नाम दिएको छ ।

बुधबार भारतको माथिल्लो सभा राज्यसभामा सम्बोधन गर्दै जया बच्चनले पहलगाम आतंकवादी हमलापछि भारतको प्रतिशोधात्मक कारबाहीलाई अप्रेसन सिन्दूर नामकरण गरिएकोमा प्रश्न उठाएकी हुन् ।

बच्चनले भनिन्– जे भयो सबै कुरा फिक्सन जस्तो भयो । केही मान्छे आए, त्यति ठुलो हत्याकाण्ड मच्चाए । एकतर्फ म तपाईहरुलाई बधाई दिन्छु, तपाईहरुले यस्ता लेखकहरूलाई राख्नुभएको छ । तपाईंहरूले भव्य नाम दिनुहुन्छ। यो अप्रेसनको नाम ‘सिन्दूर’ किन राख्नुभयो ? जबकि सिन्दूर त उजाडियो । जो मारिए, जसका पत्नी विधवा भए सिन्दूर त उजाडियो ।

अभिनेत्री बच्चनले मोदी सरकारले संविधानको धारा ३७० खारेज गरेपछि कश्मीरमा आतंकवाद खत्तम भयो भनेर ढोल पिटेको स्मरण गराइन् । मोदी सरकारको भरोसा मानेर यात्री कश्मीर जाँदा यति ठुलो घटना भएको भन्दै उनीहरूले मोदी सत्तालाई कहिल्यै माफ नगर्ने बताइन् ।