राजेश अहिराजले जाहेरीकर्ता युवतीविरुद्ध नै हाले मुद्दा

काठमाडौं । मधेश प्रदेशका पूर्वप्रमुख राजेश अहिराज भनिने राजेश झाले आफूलाई बलात्कारको जाहेरी दिने जाहेरीकर्ता  युवतीविरुद्ध नै मुद्दा दायर गरेका छन् । बलात्कारको आरोपमा पक्राउ परेका अहिराजले बुधबार काठमाडौं जिल्ला अदालतमा जाहेरीकर्ता युवतीविरुद्ध नै मुद्दा दायर गरेका हुन् ।

अहिराजबाट पीडित भनिएकी युवतीविरुद्ध अहिराजकै जाहेरीका आधारमा आपराधिक लाभको कसुरमा मुद्दा दायर भएको सर्वोच्च अदालतका सूचना अधिकारी दिपककुमार श्रेष्ठले नेपाल प्रेसलाई जानकारी दिए । उनका अनुसार धम्क्याउँदै २० लाख मागेको र नदिएपछि सामाजिक रुपमा बदनाम गर्नेदेखि आत्महत्या गर्नेसम्म धम्की दिँदै रकम लिएको दाबी गर्दै अहिराजले मुद्दा दायर गरेका हुन् ।

सुरुमा २० लाख माग गरेकोमा आफूले नगदै तीन लाख रुपैयाँ दिएको दर्ता भएको अहिराजले दायर गरेको मुद्दामा उल्लेख छ । बलात्कार पीडित युवतीले जाहेरी दिएपछि जिल्ला अदालतमा मुद्दा दायर भएको दोस्रो दिन अहिराजले पनि ती युवतीविरुद्ध आपराधिक लाभको जाहेरी दर्ता गराएका हुन् ।

काठमाडौंको नयाँ बानेश्वरस्थित आफ्नै डेरामा अहिराजले २०८१ जेठ ४ मा बलात्कार गरेको आरोप लगाउदैँ मुद्दा दायर भएको थियो । एक्लै कोठामा बसेका बेला अहिराजले आएर बलात्कार गरेको मुद्दामा उल्लेख छ ।