खानेपानीमन्त्रीको राजीनामासँगै इन्द्र बानियाको २१ मत सुरक्षित, मुख्यमन्त्री बन्ने निश्चित

चितवन । नेपाली कांग्रेस बागमती प्रदेशको संसदीय दलका नेता बहादुर सिंह लामाविरुद्धको अविश्वासको प्रस्तावमाथि मत विभाजनको प्रक्रिया सुरू भएको छ ।

अविश्वासको प्रस्ताव दर्ता भएपछि सांसद तानातानबीच आफ्नो पक्षमा बहुमत सांसद लिन सफल भएसँगै लामालाई हटाएर इन्द्र बानियाँ मुख्यमन्त्री बन्ने पक्का भएको छ ।

शुक्रबार अविश्वासको प्रस्तावमा हस्ताक्षर गर्ने २१ मध्ये १ सांसद फर्किएर लामाको पक्षमा गएपनि श्यामकुमार खड्कालाई खानेपानी मन्त्रीबाट राजीनामा गराएर बानियाँले आफ्नो कित्तामा उभ्याएका छन् ।

राजीनामा पछि नेपाल प्रेससँग मन्त्री खड्काले भने, ‘प्रकृयाअनुसार मुख्यमन्त्रीलाई संसदीय दलको नेताबाट हटाउनुपर्ने भयो । विपक्षमा मतदान गर्ने भएकोले मैले राजीनामा बुझाएको हुँ ।’

अविश्वासको प्रस्तावको हस्ताक्षर सूचीमा रहेकी माया श्रेष्ठले हस्ताक्षर कीर्ते गरिएको बताएकी छन् । मायासँगै विज्ञप्तिमा नाम भएकी सांसद मीना पराजुली अन्तिममा बानियाकै समर्थनमा खुलेर विज्ञप्ति आफूले ननिकालेको दाबी गरेकी छिन् । अन्ततः लामा इतरकै समूह बलियो भएको छ ।

बानियाँको पक्षमा २१ जनाकै समर्थन कायम रह्यो । कुल ३७ सांसदमध्ये लामातिर १६ जनामात्रै उभिएका छन् ।

बिहान १० बजे बोलाइएको संसदीय दलको बैठक केहीबेरअघि सुरू भएको छ ।