जनकपुरधाम । खाली गाग्री बोकेर पानी माग्दै जनकपुरधाममा समाजवादी युवा संघले प्रदर्शन गरेको छ ।
पानी अभावमा जनता संकटमा परेपनि प्रदेश सरकार केहि गर्न नसकेको भन्दै समाजवादी युवा संघका युवाहरुले खाली गाग्री बोकेर प्रदर्शन गरेका हुन् । उनीहरुले जनक चोकबाट प्रदेश सरकारविरुद्ध प्रदर्शन गर्दै जिल्ला प्रशासन कार्यालय धनुषा हुँदै मुख्यमन्त्री तथा मन्त्रिपरिषद्को कार्यालयसम्म पुगेको थियो ।
प्रदर्शनमा सहभागी युवाहरुले भ्रष्ट सरकार पानी दे, किसानका लागि राहत प्याकेज घोषणा गर, किसान मार्न पाइँदैन, किसान विरोधी सरकार होसियार, चुरे दोहन बन्द गर जस्ता नारा लेखिएको प्लेकार्ड बोकेका थिए ।
समाजवादी युवा संघले जिल्ला प्रशासन कार्यालयमार्फत् चार बुँदे र मुख्यमन्त्री कार्यालयमा आठ बुँदे ज्ञापन पत्र बुझाएको छ ।
संघीय सरकारलाई पठाएको ज्ञापन-पत्रमा भूमि विधेयक खारेज वा संशोधन गर्नुपर्ने, तत्काल मल र बीउको व्यवस्था गर्नुपर्ने, सुक्खाग्रस्त अवस्थाबाट बच्न दीर्घकालीन योजना ल्याउनु पर्ने र किसान तथा कृषि क्षेत्रलाई समेट्ने गरी योजनाहरू ल्याइनु पर्ने माग उल्लेख छ ।
यस्तै चुरे दोहन रोक्नुपर्ने, मल-खादको व्यवस्था गर्नुपर्ने, प्रदेश सरकारले ल्याएको चालू आर्थिक वर्षको बजेटमा दुई वटा रेड बुक बनाएको विषयमा छानबिन गर्नुपर्ने माग समेत प्रदेश सरकारसंग समाजवादी युवा संघले राखेको छ ।
Leave a Reply