काठमाडौं । त्रिभुवन अन्तर्राष्ट्रिय विमानस्थलस्थित अध्यागमन कार्यालयले भिजिट भिसालगायत समग्र अध्यागमन प्रक्रियामा आइरहेको गुनासो समाधानका लागि भन्दै नयाँ प्रविधि लागू गरेको छ । यसबाट नक्कली श्रम स्वीकृति र नक्कली एनओसीको प्रयोग गरी विदेश जान खोज्ने निरुत्साहित हुने अध्यागमन अधिकारीले विश्वास जनाएका छन् ।
ध्यागमन कार्यालयबाट जारी सूचनाअनुसार शिक्षा र श्रम मन्त्रालयसँग सिधा लिंक गरी एनओसी र श्रम स्वीकृति भिडाउन सकिनेछ ।
सूचनामा विभिन्न ट्राभल एजेन्सी, होटल व्यवसाय, वैदेशिक रोजगारसँग जोडिएका संस्था र व्यक्तिलाई स्वच्छ र नैतिक व्यवसायिक आचरण अपनाउन त्रिभुवन अन्तर्राष्ट्रिय विमानस्थल अध्यागमन कार्यालयले सूचनामार्फत आग्रह गरिएको प्रमुख अध्यागमन अधिकृत विष्णुप्रसाद कोइरालाले जानकारी दिए ।
उनका अनुसार विशेषगरी वैदेशिक रोजगार व्यवसायी र प्रवर्धक, श्रम प्रतिनिधि, स्वास्थ्य परीक्षणकर्ता, सीप तालिम प्रदायक, पैसा सटही गर्ने, भिसा प्रोसेस गर्ने, परामर्श सेवा केन्द्र, इन्टर्नसिपको नाममा कामदार पठाउने संस्था, विद्यार्थी भ्रमणको नाममा गैर विद्यार्थी लैजाने शैक्षिक संस्थालाई उक्त सूचनामार्फत विशेष आग्रह गरिएको छ ।
प्रमुख अध्यागमन अधिकृत कोइरालाले भने, ‘यो प्रणालीले अध्यागमन कार्यमा पारदर्शिता ल्याउने छ र गुनासोको संख्यामा उल्लेखनीय कमी आउनेछ।’ उनका अनुसार गम्भीर प्रविधिगत सुधारस्वरूप अब नेपाली पोर्ट प्रणालीलाई स्थानीय डाटा सेन्टरबाट नै पूर्ण क्षमतामा सञ्चालन गरिनेछ । यो व्यवस्था आजैदेखि कार्यान्वयनमा आएको हो ।
पहिलेको प्रणालीमा केन्द्रीय सर्भर जीआईडीसीमा समस्या आउँदा अध्यागमन सेवा प्रभावित हुने समस्या रहदै आएको थियो । अब भने त्यस्तो अवरोध नहुने अध्यागमन कार्यालयले जनाएको छ । साथै ब्ल्याकलिस्टमा परेकाले सिस्टम डाउन हुँदा विदेश जान पाउने समस्या पनि अब पूर्णरूपमा बन्द हुनेछ ।
यसबाट कार्यालयले नक्कली कागजातका आधारमा हुने ठगीमा कमी आउने, अध्यागमन प्रक्रियामा पारदर्शिता हुने, गुनासोको संख्या घट्ने, असम्बन्धित व्यक्तिलाई अन्य शीर्षकमा विदेश पठाउने कार्यमा रोक लगाउने अपेक्षा गरेको छ । सरकारको यो कदमलाई विदेश गएका नेपाली श्रमिक र विद्यार्थीको सुरक्षाको दृष्टिकोणले सकारात्मक पहलका रूपमा हेरिएको छ ।
Leave a Reply