मधेशका संसद प्रतिपक्षीको बहिष्कारका बाबजुद विनियोजन विधेयक पारित

जनकपुरधाम । मधेश प्रदेशसभाको बैठक प्रतिपक्षी छ दलले बहिष्कार गरेपनि आगामी आर्थिक वर्ष २०८२ /०८३ को बजेटसम्बन्धी विनियोजन विधेयक पारित गरिएको छ ।

बजेटमा बिचौलिया हावी भएको र २९४ पानका करिब ८ हजार योजना संसद छलेर ल्याएको भन्दै अर्थमन्त्री सुनिल यादवको राजिनामा माग्दै प्रतिपक्षी नेकपा माओवादी केन्द्र, जसपा नेपाल, नेकपा एससहितका ६ दलका सांसदहरुहरु बैठक बहिष्कार गरेका छन् ।

प्रतिपक्षी सबै दलले बहिष्कार गरेपनि सभामुख रामचन्द्र मण्डलले बैठकको कारवाही अगाडी बढाए । प्रतिपक्ष बिहिन संसदमा अर्थमन्त्री यादवले विनियोजन विधेयकमाथि छलफलको प्रस्ताव गरे, छलफल पनि भयो । छलफलमा उठेको प्रश्नहरुको विभागिय मन्त्रीहरुले जवाफ पनि दिए । र, उक्त विधेयक ध्वनी मतका आधारमा सर्वसम्मतले पारित भएको घोषणा सभामुखले गरे ।

सरकारले असार १ मा आर्थिक बर्ष २०८२/०८३ का लागि ४६ अर्ब ५८ करोड ३३ लाख ५१ हजारको बजेट ल्याएको थियो । विनियोजन विधेयक पारित भएसंगै साउन १ देखि सरकारलाई रकम खर्च गर्ने बाटो खुला भएको छ ।