झलनाथसँग चिनियाँ पक्षको जिज्ञासा- नेपालमा कम्युनिस्ट पार्टी किन विभाजित हुँदैछन् ? (भिडिओ)

काठमाडौं । नेकपा एकीकृत समाजवादीका सम्मानित नेता झलनाथ खनालले चिनियाँ कम्युनिस्ट पार्टीका विदेश विभाग उपप्रमुख सुन हैयानसँग नेपालको कम्युनिस्ट आन्दोलनबारे छलफल भएको बताएका छन्।

चीन भ्रमणबाट फर्केपछि पत्रकार सम्मेलन गरेर बोल्दै दुई देशबीचको सम्बन्ध विकास गर्नेबारे पनि लामो कुराकानी भएको बताए।

नेपालको कम्युनिस्ट आन्दोलन, समग्र राष्ट्रिय परिस्थिति, विकास, नेपाललाई चीनले सहयोग गर्न आवश्यक क्षेत्रलगायतको विषयमा छलफल भएको बताए।

उनले भने, ‘अहिले ६० प्रतिशत भन्दा धेरै मानिसहरू कम्युनिस्ट पार्टीप्रति आकर्षित भएको देखिन्छ। तर, तपाईँहरूको पार्टी चाहिँ किन यसरी विभाजित भएको भन्ने उहाँहरूको जिज्ञासा छ। त्यो उहाँहरूको चिन्ताजनक जिज्ञासा थियो।’

उनले चिनियाँ पक्षले नेपालका कम्युनिस्ट पार्टीका नेताहरुबीच देख्दा सिद्धान्त र नीतिको ठुलो केही विवाद नदेख्ने गरेको बताएको सुनाए।

उनले थपे, ‘नेताहरूको स्वार्थको लडाइँ मात्रै हो कि भन्नेजस्तो पनि लाग्छ भन्ने उहाँहरूको टिप्पणी थियो। यो टिप्पणीलाई नेपालका विद्वान भनिने नेताहरूले बुझ्नु, सुन्नु आवश्यक छ।’