ट्रम्पलाई चीन भ्रमणको निम्तो, चाँडै जाने तयारी

काठमाडौं । अमेरिकी राष्ट्रपति डोनाल्ड ट्रम्प चीनको भ्रमणमा जाने भएका छन्। अमेरिकी विदेशमन्त्री मार्को रुबिओले पत्रकारसँग कुरा गर्दै चीनबाट निम्तो आएको र ट्रम्प भ्रमणका लागि तयार रहेको जानकारी दिएका हुन्।

रुबिओले भने, ‘यो भ्रमण उहाँ (ट्रम्प) आफैँ गर्न चाहनुहुन्छ, त्यसैले हामी त्यसका लागि उपयुक्त मिति खोज्न काम गर्नेछौं। तर मलाई पक्का छ कि यो भ्रमण हुनेछ, किनभने दुबै राष्ट्रपतिहरू यसलाई चाहनुहुन्छ।’

आसियानको भ्रमणका क्रममा चिनियाँ विदेशमन्त्री वाङ यी सँग भेटघाट भएको प्रसंगमा पत्रकारले चिनियाँ राष्ट्रपति सी जिनपिङ र ट्रम्पबीचको सम्भावित भेटबारे प्रश्न गरेका थिए।