सम्मानमा प्रमाणपत्र र माला होइन, आर्थिक सहयोग चाहिएको छ : क्रिकेटर सुशील रावल

काठमाडौं । नेपालले मलेसियामा भएको एसिसी यु-१६ इष्ट जोन कप क्रिकेटको उपाधि जित्दा महत्त्वपूर्ण भूमिका खेलेका खेलाडी सुशील रावलले आफूलाई स्वागत सम्मान भन्दा पनि आर्थिक सहयोग चाहिएको बताएका छन् । एसीसी यु-१६ इष्ट जोन कप क्रिकेटको उपाधि जित्ने टोलीलाई विभिन्न संघसंस्थाले स्वागत तथा सम्मान गरिरहेका छन् ।

त्यसै क्रममा रावलले सामाजिक सञ्जालमार्फत सम्मानको रूपमा खादा र प्रमाणपत्र भन्दा पनि आर्थिक सहयोगको एकदमै जरुरी रहेको बताएका हुन ।

‘बझाङबाट छनौट भएर खेले पनि दैनिकी बसाई कञ्चनपुरको शुक्लाफाँटा ५ गर्जमुनिमा छ । अहिले मलाई सम्मानको रूपमा खादा र प्रमाण पत्र भन्दा पनि आर्थिक सहयोगको एकदमै जरुरी परेको छ,’ उनले लेखेका छन् ।

२र३ महिनापछि यू-१९ को छनोटको तालिमका लागि भारत जानुपर्ने र आर्थिक अवस्था कमजोर रहेको रावलले उल्लेख गरे ।

‘२/३ महिनामा यू-१९ राष्ट्रिय टीमका लागि छनोट हुँदै छ । त्यसका लागि तालिम गर्न भारत जानुपर्ने भएको छ । करिब १ लाख खर्च लाग्दै छ । आर्थिक अवस्था कमजोर छ । भनेर भन्दा मलाई गरो छैन । त्यही भएर मलाई सम्मानको खादा माला र प्रमाण पत्र भन्दा आर्थिक कुरालाई महत्त्व दिई दिनुहोला,’ उनले लेखेका छन् ।