काठमाडौं । टि-२० विश्वकपको युरोप रिजन फाइनलमा अप्रत्याशित नतिजा निकाल्दै क्रिकेटको नवोदित राष्ट्र इटलीले बलियो एसोसिएट राष्ट्र स्कटल्यान्डलाई हराइदिएको छ । इटलीले दिएको १६८ रनको लक्ष्य पछ्याउने क्रममा स्कटल्यान्डले निर्धारित २० ओभरमा ५ विकेट गुमाएर १५५ रन मात्रै जोड्न सक्यो ।
पहिलो ब्याटिङ गरेको इटलीले ओपनर एमिलियो गेको विष्फोटक अर्धसतकको मद्दतमा १६७ रनको स्कोर खडा गरेको थियो । एमिलियोले २१ बलमा ६ चौका र २ छक्कासहित ५० रन हाने । सातौं नम्बरमा आएका ग्रान्ट स्टेवार्टले २७ बलमा ४४ रन प्रहार गरे । स्कटल्यान्डका माइकल लिस्कले ३ विकेट लिएका थिए ।
जवाफी ब्याटिङमा स्कटल्यान्डले खराब सुरुवात गर्दै २९ रनमा दुई विकेट गुमाएको थियो । तेस्रो विकेटका लागि जर्ज मुन्से र रिची बेरिङटनले शतकीय साझेदारी गरे पनि त्यो जितका लागि पर्याप्त भएन । मुन्सेले ६१ बलमा ७२ रन बनाए ।
बेरिङटन ३७ बलमा ४६ रन बनाएर अविजित रहे । इटलीका बलर ह्यारी मानेटीले एक्लै ५ विकेट लिँदै स्कटल्यान्डलाई स्तब्ध तुल्याउन प्रमुख भूमिका खेले ।
इटलीको टिममा अधिकांस विदेशी खेलाडीहरु छन् । एमिलियो निको गेले यसअघि ईंग्ल्यान्डको ए टिमबाट खेलिसकेका छन् । ह्यारी मानेटी अष्ट्रेलियन मुलका हुन् । उनीसँग बीबीएल खेलेको अनुभव छ ।
आइसीसीको टि २० र्याङकिङमा स्कटल्यान्ड १३ औं र इटली ३२ औं स्थानमा रहेका छन् ।
Leave a Reply