रास्वपालाई गृहमन्त्रीको प्रश्न- रवि लामिछानेले भिजिट भिसाको दुरुपयोग गरेको हो कि होइन ? (भिडिओ)

काठमाडौं । रास्वपाले भिजिट भिसा र प्रधानमन्त्रीको स्पेन भ्रमणमा गएर नफर्किएको विषय उठाइरहेको बेलामा गृहमन्त्री रमेश लेखकले पार्टी सभापति रवि लामिछानेले भिजिट भिसाको दुरुपयोग गरेको विषय सम्झाएका छन् ।

प्रतिनिधि सभाको बैठकमा बोल्दै उनले भने, ‘रवि लामिछानेजी जो सम्मानित सदनको सदस्य पनि रहनुभएको थियो, अहिले एउटा परिस्थिति छ । उहाँ कुनै समय संयुक्त राज्य अमेरिकामा भिजिटरको रुपमा जानुभएको थियो भन्ने सुनेको छु । भिजिटरको रुपमा जाने भनेको भिजिट भिसा नै हो । उहाँ भिजिटरको रुपमा अमेरिका जानुभएको हो कि होइन ?’

यदि भिजिट भिसा वा भिजिटर अथवा निश्चित केही समय अर्को देश बसेर फर्केर आएको भिसामा गएको होइन भने के भिसामा गएका थिए जानकारी दिन आग्रह गरे ।

उनले थपे, ‘यदि अनि भिजिट भिसामै गएर त्यसै देशको नागरिकता लिएर बस्न पाइन्छ कि पाइँदैन ? त्यो भिजिट भिसाको दुरुपयोग हो कि होइन। अनि भिजिट भिसा दूरुपयोग गर्ने पार्टीको नेताका कार्यकर्ताले अर्कोलाई धेरै ज्यादा नैतिकताको प्रश्न पढाउन हुन्छ कि हुँदैन ? नैतिकताको प्रश्न अरुबाट अपेक्षा गर्ने हो कि आफूबाट प्रारम्भ गर्ने ? यति कुरा मैले आजसम्म भनेको थिइनँ । तर साथीहरु अलि गर्न नहुनेतिर जानुभएको छ ।’