पारिश्रमिक स्टन्ट : माग्नेबुढालाई ३५ लाख दिएर ६१ लाखको हल्ला (भिडिओ)

काठमाडौ‌ । अभिनेता तथा हास्यकलाकार केदारप्रसाद घिमिरे ‘माग्ने बूढा’ ले नयाँ चलचित्र ‘माग्ने राजा’ मा ६१ लाख पारिश्रमिक लिएको चर्चाले सिने नगरी खुबै गर्मायो । उनले नेपालकै महंगा कलाकारको ट्यागसमेत पाए ।

चलचित्रका निर्देशक ऋषि लामिछानेले एक सार्वजनिक कार्यक्रमम माग्ने बुढालाई ६१ लाख दिएको दावी गरेका थिए । ५१ लाख हातमै हालिसकेको र बाँकी १० लाख फिल्म चलेपछि दिइने उनको भनाइ थियो । लामिछानेले त यतिसम्म भने कि माग्ने बूढालाई दिएको पारिश्रमिक कम हो र उनी एक करोड डिजर्भ गर्छन् ।

तर, यो सबै ‘स्टन्ट’ सावित भएको छ । माग्ने बुढा स्वयम्ले अहिले आएर आफूलाई ६१ लाख रुपैयाँ दिएको हल्ला असत्य भएको बताएका छन् ।

नेपाल प्रेससँगको अन्तर्वार्तामा उनले भने, ‘त्यति धेरै पारिश्रमिक लिनु ठिक होइन, त्यो पारिश्रमिकलाई लिएर चर्चा गर्नु पनि ठिक होइन । यी दुवै कुरा खारेजयोग्य छन् ।’ उनले पटक–पटक दोहोर्याए, ‘मैले ६१ लाख पारिश्रमिक लिएकै छैन ।’

‘माग्ने राजा’ का निर्माता मुनाल घिमिरे दाङको घोराही उपमहानगरपालिका–४ का वडाध्यक्ष हुन् । यसअघि उनले दुईवटा चलचित्र निर्देशन गरेका थिए तर खासै चल्न सकेनन् । पछिल्लो समय फिल्मबाट टाढा रहेर राजनीतिमा लागेका थिए । उनी गत स्थानीय चुनावमा एमालेबाट विजयी भएका हुन् । ‘माग्ने राजा’ को निर्देशन अभिभारा भने उनले ऋषी लामिछानेलाई सुम्पिएका छन् । घिमिरे र लामिछानेको सल्लाहमा नै धेरै पारिश्रमिकको हल्ला पिटिएको हो ।

माग्नेबुढा भन्छन्, ‘जेजसो गरेर भए पनि चलचित्रले हाइप लिनुपर्यो भाइ भनेर निर्माताले भन्नुभयो । मान्छेलाई भदौ ६ गते चलचित्र आउँछ भनेर थाहा हुनुपर्यो भन्ने थियो ।’

तर, पारिश्रमिकको समाचार आएपछि माग्ने बुढालाई ‘ब्याकफायर’ भयो । सानो बजार भएको चलचित्र क्षेत्रमा निर्मातालाई डुबाउने गरी चर्को पारिश्रमिक लिएको भनेर सामाजिक सञ्जालमा आलोचना गरियो । त्यही भएर माग्नेबुढा अहिले यो हल्ला चिर्न लागिपरेका छन् ।

उनले पुनः स्पष्टिकरण दिए, ‘मैले ६१ लाख पारिश्रमिक लिएकै होइन । हाम्रो आपसी समझदारीमा मैले पारिश्रमिक लिएको छु ।’

आपसी समझदारीको रकम चाहिँ उनले खुलाउन चाहेनन् । तर, निर्माण स्रोतले गोप्य रुपमा नेपाल प्रेसलाई दिएको जानकारी अनुसार माग्ने बुढाले ३५ लाख रुपैयाँमा यो चलचित्र खेलेका हुन् । यदि चलचित्रले उच्च मुनाफा कमाएको खण्डमा निश्चित प्रतिशत ‘इन्सेन्टिभ’ दिन पनि निर्माण पक्ष सहमत रहेको बुझिएको छ ।

‘माग्ने राजा’ मा माग्नेबुढाको पारिश्रमिकबारे गत वर्ष पनि चर्चा चलेको थियो, जतिबेला उनले फिल्म साइन गरेका थिए । त्यसबखत उनले ५० लाखभन्दा बढी रकममा साइन गरेको बताइएको थियो र माग्ने बुढाले पनि घुमाउरो स्वीकारोक्ति गरेका थिए ।

५० लाखभन्दा धेरै पारिश्रमिक लिन थाल्नुभएको हो ? भन्ने नेपाल प्रेसको प्रश्नमा गत वर्ष मंसिरमा उनले जवाफ दिएका थिए, ‘मैले कहिल्यै यतिउति भनेर मागिनँ । राम्रो कथा आए बाहिरको ब्रान्डमा काम गर्छु भन्ने थियो । स्क्रिप्टहरु सुन्दा मनप¥यो । काम गर्छु भन्ने कुरा भएपछि निर्माताहरु आफैंले माया गरेर यति दिन्छु भन्नुभयो । मैले पनि हुन्छ भनें । त्यति हो ।’

माग्ने राजा भन्दा अगाडि ‘कँगारु’ नाम चलचित्रमा पनि माग्ने बुढाले ५० लाख रुपैयाँ पारिश्रमिक लिएको चर्चा चलाइएको थियो । माग्नेबुढा र स्वस्तिमा खड्कालाई लिएर बनाउने भनिएको चलचित्र भने घोषणामै सिमित रह्यो । माग्नेबुढा अहिले ‘माग्ने राजा’ बाहेक थप दुई चलचित्र ‘माइतीघर’ र ‘जेरी अन टप’ मा काम गरिरहेका छन् । माइतीघरका निर्माता रोहित अधिकारीले माग्नेबुढालाई ५० लाख रुपैयाँ पारिश्रमिक दिएको दावी गरेका थिए । तर, अहिले आएर उनको त्यो दावीमा पनि आशंका उत्पन्न भएको छ ।

‘छक्का पन्जा’ टिमभन्दा बाहिर माग्ने बूढाले अभिनय गरेका चलचित्रमध्ये दोस्रो चलचित्रको रुपमा ‘माग्ने राजा’ प्रदर्शन हुँदैछ । यसअघि उनले पूजा शर्माले निर्माण गरेको चलचित्र ‘रामकहानी’ मा अभिनय गरेका थिए । सो चलचित्र फ्लप भएको थियो ।

आफूले ‘माग्ने राजा’ मा अत्यन्त मिहेनत गरेको माग्ने बुढाले बताए । दर्शकहरु निराश नहुनुपर्ने उनको भनाइ छ ।

घिमिरेले भने, ‘यो बीचमा धेरै स्क्रिप्टहरु आएका थिए । त्यसमध्ये छानेर चलचित्र छनोट गरेँ । मैले काम गरेन भनेर कतिपय साथीहरु रिसाउनुभएको पनि होला । म उहाँहरुलाई नरिसाउनु होला भन्न चाहन्छु । मलाई हतारहतारमा पाए जति सबै चलचित्र खेल्न मन थिएन ।’

माग्ने राजाको टिजर केही दिनअघि युट्यूवमा सार्वजनिक भएको थियो । टिजरले सुखद प्रतिक्रिया पाइरहेको छ ।