खेलकुद पत्रकार मञ्च रुपन्देहीमा नयाँ नेतृत्व चयन

रुपन्देही ।धेरै कार्यक्रममा नेताहरुलाई प्रमुख अतिथि बनाएर भाषण गर्न लगाइन्छ तर बुधबार विश्व खेलकुद पत्रकार दिवसका अवसरमा खेलकुद पत्रकार मन्च रुपन्देहीले नेताहरु नबोलाएर खेलाडीलाई नै प्रमुख अतिथि बनायो भने पहिलोपटक खेलाडीलाई नै सम्मान गरेर नयाँ अभ्यासको थालनी गरेको छ ।

नेपालमा खेलकुद गतिविधिहरु धेरै भएको भएपनि सो क्षेत्रको भौतिक तथा क्षमतागत विकासमा सुधार हुन नसकेको खेल क्षेत्रका अगुवाहरुले बताएका छन् । भेलामा बोल्ने खेल संस्थाका अगुवाहरुले भौतिक संरचनाको विकास नहुँदासम्म खेल क्षेत्रले दिगो विकास गर्न नसक्ने बताउँदै त्यसमा राज्ले ध्यान दिनु पर्ने सुझाव दिएका थिए ।

मन्चमा भाषण गर्न नरुचाउने नेपाली महिला राष्ट्रिय फुटबल टिमकी पहिलो गोल किपर मोतीकला गुरुङ प्रमुख अतिथि भएर उद्घाटन, सम्मान गरेपनि उनले भाषण भने गरिनन् । कार्यक्रममा सहभागी अधिकांशले यो तरिकाको कार्यक्रमको प्रशंसा गर्दै भने यो विद्यागत रुपमा नयाँ अभियान नै थालियो ।

कार्यक्रमा गुरुङपछि अतिथि रहेका अखिल नेपाल फुटबल संघका उपाध्यक्ष दीर्घबहादुर केसी (कुमार)ले सधै पत्रकारहरु पुरस्कृत भएपनि आज पहिलोपटक पत्रकारले खेलाडी र प्रशिक्षकलाई सम्मान तथा पुरस्कृत गरेर नयाँ अभ्यास थालिएकोमा प्रशंसा गरे । उनले मोफसलको खेलकुद गतिविधिलाई खेल पत्रकारिताका माध्यमबाट अगाडि बढाउन आग्रह गर्दै विधागत रुपमा खेल पत्रकारको क्षमता अभिवृद्धिमा जोड दिए ।

केसीले खेल क्षेत्रमा रहेको भौतिक संरचनाको अभावले खेल गतिविधि राम्रोसंग अगाडि बढ्न नसकेको हुँदा त्यसमा राज्य र स्थानीय निकायको ध्यान जानुपर्ने जनाउँदै बुटवलमा खेलग्रामको अवधारणा अगाडि सारेर केन्द्र तथा स्थानीय सरकारहरुसंग अनुरोध गर्दा पनि त्यसमा चासो नदिएकोमा गुनासो गरे ।

नगर खेलकुद विकास समिति बुटवलका संयोजक बोनिन पियाले खेलकुदका गतिविधिलाई उजागर गर्न खेल पत्रकारको महत्वपूर्ण भूमिका हुने हुँदा त्यसलाई अगाडि बढाउन खेल पत्रकारहरुलाई आग्रह गरे ।

कार्यक्रममा नेपाल पत्रकार महासंघ रुपन्देही अध्यक्ष दिनेश पाण्डे, नेपाल अमेरिका पत्रकार संघका अध्यक्ष सुरज भण्डारी, एन्फाका पूर्वउपाध्यक्ष हरिप्रसाद श्रेष्ठ, रुपन्देही फुटबल संघका अध्यक्ष लोक पुन, सम्मानित नेपाली क्रिकेटका पूर्व राष्ट्रिय खेलाडी तथा प्रशिक्षक शक्ति गौचन लगायतले बोल्दै खेलकुद पत्रकारिताको फस्ट्याउनका लागि खेल गतिविधिहरु नियमित हुनुपर्ने बताउँदै त्यसमा खेल पत्रकारले सकारात्मक भूमिका खेलेको आग्रह गरेका थिए ।

मञ्चको बुधवार बुटवलमा सम्पन्न भेलाले मञ्चको नयाँ कार्यसमिति चयन गरेको छ । भेलाले सुमन अधिकारीको अध्यक्षतामा ११ सदस्यीय जिल्ला समिति सर्वसम्मत चयन गरेको हो ।

समितिको उपाध्यक्षमा यमलाल भुसाल, सचिवमा स्वस्तिक श्रेष्ठ, कोषाध्यक्षमा रवि राना, सहसचिवमा सञ्जु पौडेल रहेकी छन् भने सदस्यहरुमा प्रकाश न्यौपाने, मनोज थापा, विकास पराजुली, इन्द्र खत्री, राधेश्याम विक र कृष्ण भण्डारी निर्वाचित भएका छन् ।

सम्मान र सहयोग

कार्यक्रममा मञ्चले खेलकुद क्षेत्रमा योगदान दिएका नेपाली क्रिकेटका पूर्व राष्ट्रिय खेलाडी तथा प्रशिक्षक शक्ति गौचन तथा महिला भलिवलका प्रशिक्षक अर्जुन घिमिरेलाई सम्मान गरिएको थियो ।

कार्यक्रममा दुई दशकभन्दा बढी समयदेखि खेलकुद पत्रकारितामा सक्रिय रहेका खेल पत्रकार मनोरन्जन शर्मालाई नगद २५ हजार रुपैयाँ सहयोग प्रदान गरिएको थियो । क्यान्सरको उपचारमा रहेका शर्मालाई संस्थाबाट सो नगद सहयोग गरिएको हो ।