मोहन बस्नेतको आक्रोश- गगनजी अरू नेतालाई पनि समात्न लगाउनुस्, अनि तपाईं चाहिँ कहाँ जानुहुन्छ ?

काठमाडौं । नेपाली कांग्रेसका केन्द्रीय सदस्य मोहन बस्नेत पार्टी महामन्त्री गगन थापामाथि खनिएका छन् । सानेपामा जारी केन्द्रीय समिति बैठकमा आफ्नो धारणा राख्दै बस्नेतले चर्को आक्रोश पोखेका हुन् ।

बस्नेतविरुद्ध टेरामक्स प्रकरणमा भ्रष्टाचारको मुद्दा छ । गगन थापा आफूविरुद्ध खुलेरै लागेको भन्दै उनले संसद्‌मै पनि बोलेको बताए ।

उनले अख्तियारका प्रमुखदेखि कोही पदाधिकारी पनि सग्लो नभएको आरोप लगाए ।

नेता बस्नेतले भने, ‘प्रतिशोधको राजनीति गरे कोही सग्लो बस्दैन । अब यहाँ बढी बोल्यो भन्नुहोला, कसै न कसैले बोल्ने आँट गर्नुपर्छ । यसरी देश चल्दैन, राजनीति चल्दैन, प्रजातन्त्र समाप्त हुन्छ ।’

उनले एमालेसँग गभर्नर र आफूलाई साटेको आरोप लगाए ।

उनले थपे, ‘गभर्नर ठूलो कुरा देशको लागि, म एउटा राजनीतिक कार्यकर्ता हो, मुद्दा लड्छु, गभर्नर र मलाई रोज्नुस् भन्दा गभर्नर रोजिएर स्वार्थ पूरा गर्ने काम भयो ।’

नेता बस्नेतले आफूविरुद्ध मुद्दा चल्दा पार्टीले सहयोग नगरेको भन्दै आक्रोश पोखे ।

उनले थपे, ‘महामन्त्री गगनजी तपाईं अरू नेताहरूलाई पनि समात्न लगाउनुस्, अनि तपाईं चाहिँ कहाँ जानुहुन्छ ?’

उनले आफू स्वास्थ्यमन्त्री हुँदा एक रुपैयाँ पनि हिनामिना नगरी मन्त्रालय चलाएको दाबी गरे ।

आगामी निर्वाचनमा पनि सिन्धुपाल्चोकमा कांग्रेसलाई पहिलो पार्टी बनाएर ल्याउने उनले जिकिर गरे ।