काठमाडौं । भारतमा संविधान जारी भएको ७६ वर्षपछि धर्म निरपेक्षमाथि बहस उठेको छ । सत्तारुढ भारतीय जनता पार्टीको मातृ संस्था मानिने राष्ट्रिय स्वयंसेवक संघका महासचिव दत्तात्रय होसबालेको तर्फबाट बिहीबार आएको एक वक्तव्यले भारतीय राजनीतिक वृत्तलाई हल्लाइदिएको छ ।
आरएसएसका महासचिव होसबालेले एक कार्यक्रममा भने–भारतको संविधानका पिता बाबा साहेब भीमराव अम्बेडकरले बनाएको भारतीय संविधानको प्रस्तावनामा समाजवाद र धर्मनिरपेक्ष भन्ने शब्द थिएनन् । यी दुई शब्दलाई जोडिएको हो । के यी दुई शब्द भारतको लागि सास्वत हो ? यसको उद्देश्य के हो, यसबारे विचार गर्नुपर्छ । के आज भारतको संविधानमा यी शब्द आवश्यक छ ? इमरजेन्सीको बेलामा देशमा मौलिक अधिकार थिएन, मौलिक अधिकार थिएन,न्याय पंगु बनाइएको थियो त्यस्तो बेलामा यी शब्द घुसाइएको थियो ।
भारतको संविधान सन् १९४९ जनवरीमा निर्माण भएको थियो भने सन् १९७७ मा तत्कालीन प्रधानमन्त्री इन्दिरा गान्धीको पालामा संकटकाल घोषणा लागु गरिएको थियो । भारतमा एक सय वर्षअघि हिन्दू स्वयंसेवक संघका रुपमा स्थापना भएको आरएसएस निकै पुरानो र बलियो राजनीतिक शक्ति मानिन्छ ।
भारतका हालका प्रधानमन्त्री नरेन्द्र मोदीलगायत भाजपाका अधिकांश नेताहरु आरएसएसबाटै स्थापित भएका हुन् । आरएसएसले भारतलाई हिन्दूराज्य बनाउनुपर्ने विषय वकालत गर्दै आएको छ । भारतको संविधानमा धर्म निरपेक्ष राष्ट्र उल्लेख छ ।
यसैबिच स्वतन्त्र भारतपछि लामो समय शासन गरेको कांग्रेस पार्टीले आरएसएस महासचिव होसबालेको वक्तव्यप्रति आपत्ति जनाएको छ । कांग्रेसले आरएसएस र बिजेपीको सोच संविधान विरोधी रहँदै आएको प्रतिक्रिया दिएको छ ।
कांग्रेसले भनेको छ–यो बाबा बाहेब अम्बेडकरको संविधानलाई खत्तम गर्नेहरूको साजिश हो, जुन कुरा बिजेपी र आरएसएसले सदैव प्रयास गर्दै आएका छन् । बिजेपी नेताहरुले चुनावमै भनेका थिए संविधान बदल्न हामीलाई ४ सयभन्दा बढी सीट चाहिन्छ । तर कांग्रेसले उनीहरुको प्रयासलाई कुनै हालतमा सफल हुन दिने छैन ।
यता भारतीय विदेश मन्त्री एस जयशंकरले दत्तात्रयको वक्तव्यबारे प्रतिक्रिया दिन अस्वीकार गरेका छन् । बीबीसीका अनुसार एक पत्रकार सम्मेलनमा उनलाई यसबारे प्रश्न गर्दा सरकारको मन्त्री भएका कारण यस्ता विषयमा आफूले प्रतिक्रिया दिनु उचित नहुने बताएका छन् ।
Leave a Reply