सुर्खेतमा रास्वपाको जनमत अभियान

सुर्खेत । राष्ट्रिय स्वतन्त्र पार्टी (रास्वपा)ले तेस्रो स्थापना दिवसको अवसरमा सुर्खेतको वीरेन्द्रनगरमा विविध कार्यक्रम गरेको छ । वीरेन्द्रनगरमा सभापति रवि लामिछानेविरुद्ध भएको भनिएको राजनीतिक हस्तक्षेपको विरोधमा रास्वपाले जनमत संकलन अभियान चलाएको हो ।

मंगलगढी चौकबाट सुरु भएको र्‍याली वीरेन्द्रचौक परिक्रमा गर्दै पुनः मंगलगढीमै कोणसभामा परिणत भएको थियो। चार घण्टा लामो हस्ताक्षर संकलन अभियानमा ६०० भन्दा बढीले हस्ताक्षर गरेको रास्वपा सुर्खेतका सभापति रमेशकुमार सापकोटाले जानकारी दिए ।

उनले पार्टी अध्यक्षविरुद्धको कारबाहीलाई ‘राजनीतिक प्रतिशोध’को संज्ञा दिँदै न्यायको पक्षमा जनतालाई एकजुट हुन आह्वान गरे ।

कोणसभामा बोल्ने नेताहरूले लामिछानेमाथि भइरहेको व्यवहारलाई अन्यायपूर्ण भन्दै लोकतन्त्र, न्याय र सुशासनका पक्षमा संघर्ष जारी राख्ने प्रतिबद्धता जनाए ।

स्थापना दिवसकै सन्दर्भमा रास्वपाले समसामयिक राजनीतिक विषयमा अन्तरक्रिया कार्यक्रम पनि आयोजना गरेको थियो। कार्यक्रममा स्थानीय नेता, बुद्धिजीवी, युवा तथा नागरिक समाजका प्रतिनिधिहरूको उल्लेख्य उपस्थिति थियो ।