साढे २ घण्टा वेलमा उभिएर बैठकबीचै सदनबाट बाहिरिए रास्वपा सांसद (भिडिओ)

काठमाडौं । राष्ट्रिय स्वतन्त्र पार्टी (रास्वपा)का सांसदहरु प्रतिनिधिसभा बैठकबाट बाहिरिएका छन् । भिजिट भिसा प्रकरणमा गृहमन्त्री रमेश लेखकको राजीनामा र छानबिन समितिको मागसहित वेल घेराउ गर्दै आएका उनीहरू आज बैठक चल्दाचल्दै बाहिरिएका हुन् ।

रास्वपाका सांसदहरूले वेल घेराउ गरिरहे पनि सभामुखले बजेटमाथिको छलफल अघि बढाएपछि उनीहरु करिब साढे २ घण्टा उभिएका थिए, तर अहिले कांग्रेसका प्रवक्ता डा. प्रकाशशरण महत बोल्न थालेपछि उनीहरु सदनबाट बाहिरिएका छन् ।

रास्वपाका सांसदहरु बाहिरिएको देखेपछि प्रवक्ता महतले लगातार उभिन गाह्रै हुन्छ भन्दै कटाक्ष गरे । यसअघि विरोध जनाउँदै वेलमा बस्ने गरेको भए पनि आलोचना भएपछि उनीहरु आज उभिएका थिए ।

सभामुख देवराज घिमिरेले पेलेर सदन अघि बढाएपछि राप्रपाका सांसदहरू यसअघि नै बाहिरिएका थिए ।