रुसी नागरिक सर्वेक्षणः अमेरिका भन्दा धेरै घृणा जर्मनीसँग भएको खुलासा

काठमाडौं । विश्व राजनीतिमा रुसका प्रमुख शत्रुहरू युक्रेन र अमेरिका मानिन्छन्। तर, हालै गरिएको एक सर्वेक्षणले रुसी जनमतमा फरक दृष्टिकोण देखाएको छ। सर्वेक्षणअनुसार, रुसी नागरिकहरूले सबैभन्दा धेरै घृणा गर्ने देशको सूचीमा जर्मनी पहिलो स्थानमा परेको छ।

रुसी सञ्चारमाध्यम आरटीका अनुसार, पश्चिमा समर्थकको आरोप खेपिरहेको अनुसन्धान संस्था ‘लेभादा सेन्टर’ले गरेको सर्वेक्षणमा ५६ प्रतिशत सहभागीले जर्मनीलाई रुसको सबैभन्दा ठूलो दुस्मनको रूपमा देखाएका छन्।

यता, अमेरिकालाई दुस्मन ठान्नेको संख्या ४० प्रतिशतमा सीमित रहेको छ। बेलायतप्रति ४९ प्रतिशतले घृणा व्यक्त गरेका छन् भने युक्रेनप्रति ४३ प्रतिशतले नकारात्मक धारणा व्यक्त गरेका छन्।

विश्लेषकहरूका अनुसार पछिल्लो समय युक्रेनलाई जर्मनीले लामो दूरीका मिसाइल दिनु, युक्रेनमै यस्ता मिसाइल उत्पादनमा सहयोग गर्नु र तिनै मिसाइलमार्फत रुसी भूमिमा आक्रमण हुने खतरा बढ्नु जस्ता कारणले जर्मनीप्रति रुसी नागरिकहरूको आक्रोश चुलिएको हो।