झलनाथको टिप्पणी- राजतन्त्रलाई अन्त्य गरेर गणतन्त्र ल्याएपनि जनताको बन्न सकेन (भिडिओ)

काठमाडौं । नेकपा एकीकृत समाजवादीका सम्मानित नेता झलनाथ खनालले गणतन्त्र आम जनताको बन्न नसकेको टिप्पणी गरेका छन्। गणतन्त्र दिवसका अवसरमा पार्टीले आयोजना गरेको कार्यक्रमलाई सम्बोधन गर्दै गणतन्त्र सामन्त पुँजीपतिहरूको बनिरहेको बताए।

उनले भने, ‘गणतन्त्र काला बजारिया र तस्करहरूको बनिरहेको छ जनताको गणतन्त्र बन्न सकेको छैन। गणतन्त्रसँग हामीले नयाँ संविधान बनायौँ, त्यसपछि निर्वाचनमा वामपन्थीहरूलाई विजयी बनाएपछि देशमा आमूल परिवर्तन आउँछ भन्ने विश्वास राखेका थिए। तर त्यो शक्ति हाम्रो नेतृत्वलाई बाँदरको हातमा नरिवल बन्न पुग्यो।’

उनले एउटा व्यक्तिको हातमा भएको सार्वभौम सत्ता जनताको हातमा ल्याएको उपलब्धिलाई ठूलो मान्नुपर्ने बताए। जनतामाथि बुर्कुसी मारेर, अधिकार खोसेर बसेको राजतन्त्रलाई अन्त्य गरेको पनि स्मरण गरे।