काठमाडौं । नेपाली कांग्रेसका नेता डा. शेखर कोइरालाले कांग्रेसका नेता कार्यकर्ताहरूले गलतलाई गलत भन्न सिक्नुपर्ने बताएका छन् । नेपाल नाई संघको ३५औँ राष्ट्रिय सम्मेलनलाई सम्बोधन गर्दै कसैले कुनै कुरा गलत भनेको छ भने त्यो सधैँ गलत नै हुने बताए ।
उनले भने, ‘कति बोलेको भन्छन्, गाह्रो स्थिति छ, बोलेन भने किन बोलेन भन्छन्, बोल्यो भने किन बोलेको भनेर आइरहेको छ । तर, हामीहरूले गलत काम गर्न हुँदैन । हामी बीपी कोइरालाका चेलाहरू भयौँ । हामीले समाजमा गलत प्रचार हुने काम गर्न हुँदैन । जसले कांग्रेसलाई कमजोर बनाओस्, त्यस्ता काम हामीहरूले नगरौँ ।’
उनले राजनीति गर्नेहरूले नैतिकता र संस्कारमा अडेर बस्नुपर्ने बताए । उनले कांग्रेस अहिले सरकारमा भएपनि सत्तामा नभएको दोहोर्याए ।
उनले थपे, ‘सत्तामा एमाले छ । सरकार बस्ने मन्त्रीहरू र हाम्रो सभापति सहकार्य गरेर अगाडि बढ्नुहोस् । हामी बाहिर भएकाहरूले गलत काम भइरहेको छ भने त्यसलाई जनतामा लान जरुरी छ । हामी सरकारमा छौँ भनेर चुप लागेर बस्न मिल्दैन । हाम्रो भोलिको प्रतिस्पर्धी एमाले नै हुन्छ ।’
उनले एमाले नेतृत्वको सरकारले गरेको गलत कामलाई गलत भन्ने सके कांग्रेसको भविष्य उज्ज्वल रहेको जिकिर गरे ।
शेखरले भने, ‘प्रधानमन्त्रीले १५ गते काठमाडौं कब्जा गर भनेर पार्टीमा भन्नुभयो। यो भन्दा गलत र निरङ्कुश कुरा केही पनि हुँदैन ।’
Leave a Reply