प्रशासकीय अधिकृतलाई राजु पाण्डेको स्पष्टीकरण- मेयरको आदेश पालन गरेको हुँ

काठमाडौं । काठमाडौं महानगरपालिकाका नगर प्रहरी प्रमुख राजु पाण्डेले प्रशासकीय अधिकृत सरोज गुरागाईंलाई स्पष्टीकरणको जवाफ दिएका छन् । आफूलाई कार्यालय प्रवेशमा अवरोध गरेको सम्वन्धमा गुरागाईंले गत साता उनलाई स्पष्टीकरण सोधेका थिए ।

आफ्नो जवाफमा पाण्डेले मेयर बालेन शाहको आदेशमा चलेको बताएका छन् । उनको जवाफलाई उद्धृत गर्दै स्रोतले भन्यो, ‘मेयर सा’बको आदेशमा मैले आफ्नो कर्तव्यपालन गरेको हुँ ।’

प्रशासकीय अधिकृतको गाडीमा ह्वील लक गरेको विषयमा पनि उनलाई सोधिएको थियो । पाण्डेले गाडीको सुरक्षाका खातिर ह्वील लक गरेको दाबी गरेका छन् ।

प्रशासकीय अधिकृत गुरागाईंले पाण्डेको स्पष्टीकरण आएको, तर आफूले राम्ररी हेर्न नपाएको बताए ।

‘उहाँले जवाफ बुझाउनुभएको छ । मैले अध्ययन गरिसकेको छैन । भोलि राम्रोसँग हेरेर आवश्यक निर्णय लिनेछु’, उनले नेपाल प्रेससँग भने ।