प्रचण्डले यसरी गरे कम्युनिष्ट किल्ला झुल्खेतकाे बयान, जहाँ जनार्दन शर्मासँग भएको थियो पहिलो भेट

रुपन्देही । जनतासँग माओवादी मध्यपहाडी लोकमार्ग जनजागरण अभियानअन्तर्गत रुकुमपश्चिमबाट बिदाई हुँदा अध्यक्ष पुष्पकमल दाहाल प्रचण्डले नेता जनार्दन शर्मासँग पहिलो भेट भएको स्मरण गरेका छन् । उनले सम्झेको झुल्खेत क्षेत्रलाई अहिले माओवादीका नेता कार्यकर्ताले चर्चामा ल्याएका छन् ।

‘अध्यक्ष प्रचण्ड हिल गाउँमा भएको प्रशिक्षणको क्रममा झुल्खेत आउनुभएको रहेछ, जतिबेला उहाँ विश्वासको नामबाट स्थापित हुनुहुन्थ्यो । उहाँले आज बताएअनुसार नेता जनार्दन शर्मासँग पहिलो भेट यही भएको रहेछ’, प्रेस सेन्टरका नेता नरेन्द्र केसीले भने ।

झुल्खेतका स्थानीय केसीका अनुसार २००९ सालमा प्रथम कम्युनिष्ट शहीद कामी बुढाले कम्युनिष्टको बीउ छरेको यो ठाउँ विसं २०४० को दशकमा रुकुमेली कम्युनिष्ट आन्दोलनको केन्द्र थियो।

खासगरी खड्कबहादुर बुढा जिल्ला सेक्रेटरी रहँदा चुनखोला र साँखखोलाको दोभानमा रहेको झुल्खेत कम्युनिष्टको केन्द्रमात्र बनेन, योभन्दा पूर्वी क्षेत्रलाई पूरै कम्युनिष्ट बनाउन ऐतिहासिक भूमिका निर्वाह गरेको उनी बताउँछन् । फलस्वरूप जनयुद्धमा सदरमुकाम नजिकै भएर पनि आधार इलाकीय भूमिका निर्वाह गरेको र शान्तिपूर्ण चुनावी राजनीतिमा पनि निरन्तर योगदान गर्दै आएको उनको भनाइ छ ।

सो क्षेत्रलाई कम्युनिष्ट केन्द्र बनाउन पार्टीका अग्रज नेताहरु खडकबहादुर बुढा, नन्दराम पुन, भीमबहादुर ओली, हिमबहादुर पाण्डे, गम्मरसिंह बोहरालगायत पुरानो पुस्ता तथा विभिन्न चरणमा आन्दोलनको नेतृत्व गर्ने नयाँ पुस्ताको ऐतिहासिक भूमिका रहेको केसीले जानकारी दिए ।

बैतडीको पाटनबाट सुरु भएको अभियान आज लुम्बिनी प्रदेश प्रवेश गरेको हो । आज रोल्पाको थवाङमा जनसभा गरी यही बास बस्ने माओवादी केन्द्रका सचिव तथा लुम्बिनी प्रदेश इन्चार्ज चन्द्रप्रकाश खनाल बलदेवले जानकारी दिए ।