मुसिकोटमा प्रचण्डलाई भेडाको ऊनबाट बनेको स्थानीय उत्पादन उपहार

रुकुम पश्चिम । बैतडीको पाटनबाट सुरु भएको नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ नेतृत्वको मध्यपहाडी लोकमार्ग अभियान लुम्बिनी प्रदेशमा प्रवेश गरेको छ।

मध्यपहाडी क्षेत्रमा हाल वर्षा भइरहेको अवस्थामा प्रतिकुल मौसमका बीच अभियान टोली रुकुम पश्चिम हुँदै रुकुमपूर्व प्रवेश गरेको हो ।

अभियानको क्रममा बैतडीको पाटनमा फहराइएको राष्ट्रिय झण्डा र कम्युनिष्ट पार्टीको झण्डा कर्णाली प्रदेश टोलीले लुम्बिनी प्रदेश टोलीलाई औपचारिक रूपमा हस्तान्तरण गरेको छ ।

टोलीलाई मुसिकोट नगरपालिका–७, साँखाबाट बिदाइ गरिएको थियो। कर्णाली प्रदेश इन्चार्ज कालिबहादुर मल्लले अध्यक्ष प्रचण्डलाई भेडाको ऊनबाट बनेको स्थानीय उत्पादन उपहार स्वरूप प्रदान गर्दै सम्मानपूर्वक बिदाइ गरेका थिए ।

स्थानीय संस्कृतिको प्रवर्द्धन र उत्पादनप्रति सम्मानस्वरूप दिइएको सो उपहारले अभियानको आत्मीयता र जनसङ्गठनबीचको सम्बन्ध झल्काउँछ ।

अभियानको अन्तिम गन्तव्य सोलु (सोलुखुम्बु) मा पुगेर अभियानको समापन गरिनेछ। तराईको हुलाकी मार्ग केन्द्रित अभियान र मध्यपहाडी लोकमार्ग अभियानलाई जनतासँग तथा वर्गीय आधारमा पार्टीको सम्बन्ध सुदृढ गर्ने राजनीतिक जागरणको अभियानको रूपमा लिएको छ ।