राप्रपा सांसद रोशन कार्कीको आरोप- सरकारले प्रहरी प्रशासनको मण्डलेकरण गर्दैछ

काठमाडौं । मण्डले शब्द पञ्चायतकालमा बहुदलवादी हालका कांग्रेस कम्युनिष्टहरुले पञ्चहरुलाई गाली गर्दा सम्बोधन गरिन्थ्यो । बहुदलीय व्यवस्था स्थापनाको लामो समयसम्म पनि पूर्वपञ्च विशेषगरी राप्रपालाई मण्डले भन्थे उनीहरु ।

तर अब समय फेरिएछ । प्रतिनिधि सभाको आइतवारको बैठकमा राप्रपा सांसद तथा राजाको शाही शासन कालकी मन्त्री रोशन कार्कीले कांग्रेस एमालेको सरकारलाई मण्डलेको संज्ञा दिइन् । उनले नेपाल प्रहरीको मण्डलेकरण गरिएको आरोप समेत लगाइन् ।

सांसद कार्कीले भनिन्– प्रहरी प्रशासनको प्रशासन मण्डलेकरण गरिएको छ । सरकार मण्डलेकरण भइरहेको छ । प्रहरीले सत्तापक्षको कुर्सीमा बसेकाहरु प्रतिपक्षमा आउन सक्छन् र प्रतिपक्षमा रहेकाहरु सत्तामा आउन सक्छन् भन्ने ख्याल नगरेर दमन गरेको छ ।

सामाजिक संजालमा लेखेको कारण राप्रपाका युवा नेताहरु पक्राउ परेको तथा राजा पक्षधरलाई गैरकानूनी थुनामा राखिएको भन्दै सांसद कार्कीले सरकार मण्डलेकरणमा गएको आरोप लगाएकी हुन् ।