ड्राइभरको पनि हत्या गरिनाले मदन-आश्रित मृत्यु रहस्यमय छ, सरकारले छानबिन गर्नुपर्छः माधव नेपाल (भिडिओ)

काठमाडौं । नेकपा एकीकृत समाजवादीका अध्यक्ष माधव नेपालले एमालेका तत्कालीन महासचिव मदन भण्डारी र सङ्गठन विभाग प्रमुख जीवराज आश्रितको रहस्यमय मृत्युबारे छानबिन गर्न सरकारसँग माग गरेका छन् ।

३२औं मदन-आश्रित स्मृति दिवसको अवसरमा आयोजित कार्यक्रमलाई सम्बोधन गर्दै उनले दुई नेताहरूको रहस्यमय मृत्युमा प्रतिक्रियावादी पार्टीहरूसँग जोडिएको योजना भएको सुन्नमा आएको बताए ।

उनले भने, ‘दुवै व्यक्तिलाई रहस्यमय दुर्घटना, सुन्नमा आइरहेको छ, कतिपय नेताहरूले कुरा पनि उठाएका छन् अरे, कुनै प्रतिक्रियावादी पार्टीहरूसँग जोडिएको योजना थियो रे ! हो भने पनि छानबिन गरेर सत्यतथ्य ल्याएर अपराधीहरूलाई नांगेझार परेर कसरी उनीहरूले मदन भण्डारी र जीवराम आश्रितको हत्या गरे, त्यसलाई उजागर गर्न सक्नुपर्छ । त्यसको निम्ति अहिलेको सरकारको ध्यानाकर्षित गर्न चाहन्छु । एउटा प्रमाणको रूपमा रहेको ड्राइभरको पनि पछि हत्या गरियो । त्यो हत्या पनि रहस्यमय छ ।’

अध्यक्ष नेपालले दुवै नेताहरूको निधनले कम्युनिष्ट र लोकतान्त्रिक आन्दोलनलाई ठूलो क्षति भएको बताए ।