काठमाडौं । राष्ट्रिय स्वतन्त्र पार्टी (रास्वपा)ले पार्टी सभापति रवि लामिछानेविरुद्ध राज्यले किर्ते जाहेरी खडा गरेर फौजदारी मुद्दा तयार पारेको दाबी गरेको छ।
प्रतिनिधि सभाको बैठकमा बोल्दै रास्वपाकी सांसद सोविता गौतमले सभापति लामिछानेको मुद्दामा आजभोलि जाहेरीकर्ता बनाइएकाहरूले सार्वजनिक रूपमा नै आफूहरूले कुनै किटानी जाहेरी दिएको बताउन थालेको बताइन्।
त्यसबारे उनको भनाइ जस्ताको त्यस्तै
आजभोलि रवि लामिछानेको मुद्दामा जाहेरीकर्ता बनाइएकाहरूले सार्वजनिक रूपमा नै मैले रवि लामिछानेविरुद्ध कुनै किटानी जाहेरी दिएको थिएन। मलाई थाहा नै नदिई अभियोग पत्रमा नाम लेखियो। कसैविरुद्ध किटानी जाहेरी नै नहालेको व्यक्तिलाई उजुरीकर्ता बनाइयो भन्दै सार्वजनिक रूपमा प्रश्न गरिरहेका छन्।
भोलि यो विषयमा अदालतले भोलि आफ्नै ढङ्गबाट निराकरण गर्ला नै। तर सामाजिक र राजनीतिक वृत्तमा राज्यले किर्ते जाहेरीको निर्माण गरी एक जना राजनीतिक नेतृत्वका विरुद्ध फौजदारी मुद्दा खडा गरेको कुरा गम्भीर चासोको रूपमा आएको छ।
शक्तिको दुरुपयोग आफैँमा संविधान विपरीतको कार्य हो र जब सत्ता र शक्ति राजनीतिक प्रतिशोधको साधन बन्छ। त्यो संस्थागत भ्रष्टाचारको चरम रूप हो। पक्राउ पुर्जीविना गरिएको पक्राउ, पूर्वाग्रहपूर्ण अनुसन्धान र बिना किटानी जाहेरी, नाम लेखेर अभियुक्त बनाउने कार्य सबै मानव अधिकारसम्बन्धी राष्ट्रिय, अन्तर्राष्ट्रिय कानुनको गम्भीर उल्लङ्घन हुन्।
Leave a Reply