पोखरा । नवौं पोखरा स्पोर्टस् अवार्डमा भलिबलका अरुणा र विश्वास वर्ष उत्कृष्ट खेलाडी घोषित भएका छन् ।
नेपाल खेलकुद पत्रकार मञ्च गण्डकीले शुक्रबार पोखरा इभेन्ट सेन्टरमा आयोजना गरेको समारोहमा मनोनयनमा परेका उत्कृष्ट ३ मध्ये वर्ष खेलाडी महिलातर्फ अरुणा र पुरुषतर्फ भलिबलका विश्वास वर्ष उत्कृष्ट खेलाडी बनेका हुन् । दुवैले पुरस्कारस्वरुप टेलजी इलेक्ट्रिक स्कुटर साथमा अवार्ड प्राप्त गरे ।
वर्ष उत्कृष्ट महिला खेलाडी विधामा अरुणासहित आइटिएफ तेक्वान्दो सुस्मिता थापा मगर र फेन्सिङकी कृपा गुरुङ मनोनयनमा परेका थिए । पुरुषतर्फ विश्वाससहित टेनिसका प्रदीप खड्का र फुटबलका सुमित श्रेष्ठ थिए ।
लाइफटाइम अचिभेमेन्ट अवार्डबाट शुटिङकी प्रशिक्षक भगवती खत्री केसीलाई सम्मान गरेको छ । उनलाई चाँदीको करुवासहित अवार्ड प्रदान गरिएको थियो । उदीयमान खेलाडीतर्फ क्रिकेटकी रचना चौधरी उत्कृष्ट बनिन् ।
सो विधामा भलिबलका जितबहादुर सार्की र एथ्लेटिक्सका बादल कार्की समेत उपाधि होडमा थिए । टेनिसका नीरज थापा र भलिबलका रमेश केसीलाई पछि पार्दै उत्कृष्ट प्रशिक्षक फुटबलका राजेन्द्र तामाङ बने ।
उत्कृष्ट खेल संस्थाको अवार्ड म्याग्दी जिल्ला भलिबल संघले प्राप्त गर्यो भने वर्ष उत्कृष्ट खेल पत्रकारको अवार्ड बिजय नेपाललाई प्रदान गरियो । उनीहरूलाई ३५ हजारसहित अवार्ड प्रदान गरिएको छ ।
Leave a Reply