काठमाडौं । यही जेठ १५ गतेबाट रिलिज हुने चलचित्र ‘महाभोज’को ‘लालुमै’ बोलको गीत सार्वजनिक भएको छ । आइतबार राजधानीमा एक कार्यक्रमका बीच यो गीत सार्वजनिक गरिएको हो। आयोजित कार्यक्रममा चलचित्रको निर्देशक, कलाकारहरु र पत्रकारहरूको बाक्लो उपस्थिति थियो ।
सार्वजनिक गीतमा निर्देशक तथा अभिनेता निश्चल बस्नेत र गायिका अस्मिता अधिकारीको आवाज छ। हर्क साउदको शब्द रहेको यो गीतमा कोसिस क्षेत्री र केतन क्षेत्रीको सङ्गीत, पुष्कर खत्रीको एरेञ्ज र केतन क्षेत्रीकै रेकर्ड प्रोडक्सन रहेको छ ।
गीतको भिडियोमा चलचित्रका मुख्य कलाकार दयाहाङ राई, खगेन्द्र लामिछाने, अञ्जना बराइली, मलिका महत, गौमाया गुरुङ र निश्चल बस्नेत स्वयंको नृत्य देख्न सकिन्छ । गीतको भिडियाेलाई कोरियोग्राफर सुनिल क्षेत्रीले कोरियोग्राफी गरेका हुन।
गीतमा स्वर दिएका तथा नृत्य गरेका निश्चल बस्नेत र चलचित्रका निर्देशक दिनेश राउतले वर्ष २०१२ मा एकै वर्ष चलचित्र निर्देशन सुरु गरेका थिए ।
त्यसपछि यी दुईले २०१७ मा चलचित्र ‘पर्व’मा सहकार्य गरे। सो चलचित्रको चर्चित गीत ‘काले दाइ’मा निश्चल स्वयंले स्वर दिएका थिए भने भिडियाेमा पनि उनी आफैले अभिनय गरेका थिए ।
क्लक वर्क क्रियशन र पिक्चर फ्रेमको संयुक्त ब्यानरमा निर्माण भएको ‘महाभोज’ नेपालसहित विभिन्न देशहरूमा एकसाथ प्रदर्शनमा आउँदैछ ।
हिमाल कडरिया निर्माता रहेको चलचित्रमा आर्यन सिग्देल, दयाहाङ राई, खगेन्द्र लामिछाने, अञ्जना बराइली, गौमाया गुरुङ, मलिका महत, वसुन्धरा भुसाल, मोहन निरौला, बुद्धि तामाङ, कमलमणि नेपाल, पुष्कर गुरुङ, विनोद न्यौपाने, आभा अर्याल, र वीरेन्द्र सिंह कुशवाहलगायत कलाकारहरूको अभिनय छ ।
Leave a Reply