काठमाडौं । इन्डियन प्रिमियर लिग (आइपीएल) राजस्थान रोयल्सका कप्तान रियान परागले लगातार ६ बलमा ६ छक्का प्रहार गरेका छन् । कोलकत्ता नाइट राइडर्स विरुद्धको खेलमा उनले यो दुर्लभ किर्तिमान रचेका हुन् ।
कोलकत्ताले पहिलो ब्याटिङ गर्दै २०६ रनको विशाल स्कोर खडा गरेको थियो । जवाफी ब्याटिङ गरिरहेको राजस्थान परागको विष्फोटक इनिङ लक्ष्य पछ्याइरहेको छ । ताजा स्थितिमा राजस्थानले १६ ओभरको समाप्तिमा १६४ रन जोडेको छ ।
रियान परागले १३ औं ओभरका पाँच बलमा ईंग्ल्यान्डका अलराउन्डर मोइन अलिलाई लगातार ५ बलमा ५ छक्का प्रहार गरेका थिए ।
पहिलो बलमा सिम्रोन हेटमेयरले एक रन लिएपछि बाँकी ५ बललाई परागले डाँडा कटाइदिएका हुन् । यो ओभरमा अलीले एउटा वाइड बल पनि फ्याँकेका थिए ।
लगत्तैको १४ औं ओभरको पहिलो बलमा फेरि हेटमेयरले एक रन लिए । बाँकी दोस्रो बलमा छक्का हान्दै परागले लगातार बलमा छ छक्का हानेका हुन् ।
यो समाचार बनाउँदासम्म पराग ४२ बलमा ९२ रन बनाएर खेलिरहेका छन् । उनले ५ चौका र ८ छक्का प्रहार गरिसकेका छन् ।
Leave a Reply