मिश्रलाई आज पनि हत्कडीमै छिराइयो अदालत, प्रहरी परिसरमा राप्रपा कार्यकर्ताको खोसियो फोन

काठमाडौं । राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्रलाई म्याद थपका लागि फेरि अदालत लगिएको छ । एक हप्ता अगाडि थपिएको म्याद सकिएपछि आज फेरि जिल्ला अदालत काठमाडौं पुर्‍याइएको हो ।

मिश्रलाई आज पनि हत्कडी लगाएरै अदालत पुर्‍याइएको थियो । गाडीबाट ओर्लिएपछि पनि हत्कडी नफुकालिएको त्यहाँ उपस्थित राप्रपा केन्द्रीय सदस्य रञ्जन कार्कीले बताए ।

यसअघि प्रहरी परिसरमा प्रहरीले एक राप्रपा कार्यकर्ताको मोबाइल फोन खोसेको छ । काठमाडौं क्षेत्र नम्बर १ का राप्रपा कार्यकर्ता जोशीको फोन परिसरको प्रतीक्षालयबाट प्रहरीले खोसेको हो ।

मिश्रलाई बाहिर निकालिँदै गरेको थाहा पाएपछि उनले वकिलहरूलाई जानकारी दिन फोन गर्न खोजेका थिए । तर, फोन गर्न नपाइ प्रहरीले खोसेको स्रोतले बतायो । रवीन्द्र मिश्रलाई यता जिल्ला अदालतभित्र प्रवेश गराइसकेपछि मात्रै जोशीले आफ्नो फोन फिर्ता पाएका छन् ।