काठमाडौं । नेपाल क्रिकेट संघ (क्यान)ले आईसीसी विश्वकप लिग- २ अन्तर्गत त्रिकोणात्मक एक दिवसीय सिरिज र टी-२० सिरिजका लागि दोस्रो चरणको बन्द प्रशिक्षणमा २५ खेलाडी बोलाएको छ ।
आउँदो जेठ तेस्रो साता स्कटल्यान्डमा हुने सिरिजका लागि क्यानले ५३ खेलाडीबाट छानेर २५ खेलाडीलाई बन्द प्रशिक्षणमा बोलाएको हो । नेपालले लिग- २ अन्तर्गत स्कटल्यान्ड र नेदरल्यान्ड्ससँग ओडीआई र टी-२० सिरिज खेल्नेछ ।
क्यानले ५३ खेलाडीलाई चार टोली बनाएर कोर क्याम्पसँगै अभ्यास खेल खेलाएको थियो । उक्त क्याम्पपछि क्यानले दोस्रो चरणको बन्द प्रशिक्षणका लागि २५ खेलाडी छनोट गरेको हो ।
उक्त टोलीमा पछिल्लो समय खराब लयमा रहेका कुशल मल्ल पर्न असफल भएका छन् । उनीसँगै राष्ट्रिय टोलीबाट खेलिसकेका विवेक यादव, सन्दीप जोरा, सागर ढकाल जस्ता खेलाडी पनि दोस्रो चरणको बन्द प्रशिक्षणमा पर्न सकेका छैनन् ।
युवराज खत्री, शुभ कंशाकार, किरण ठगुन्ना जस्ता युवा खेलाडी भने टोलीमा समेटिएका छन् ।
बन्द प्रशिक्षणमा परेका २५ खेलाडी
रोहित पौडेल (कप्तान), आसिफ शेख, कुशल भुर्तेल, अनिलकुमार साह, भीम सार्की, दीपेन्द्रसिंह ऐरी, गुल्शनकुमार झा, अर्जुन साउद, बसीर अहमद, दिलीपनाथ, आरिफ शेख, युवराज खत्री, किरण ठगुन्ना, सन्दीप लामिछाने, ललितनारायण राजवंशी, शाहव आलम, सोमपाल कामी, करण केसी, नन्दन यादव, प्रतिश जीसी, रिजन ढकाल, आकाश चन्द, रुपेश सिंह, लोकेश बम र शुभ कंशाकार ।
Leave a Reply