माधव नेपाल भन्छन्– हामीसँग जनताको मतको कमी छैन, एमालेमा विलीन हुँदैनौँ

काठमाडौं । नेकपा एकीकृत समाजवादीका अध्यक्ष माधव नेपालले आफ्नो पार्टीलाई नेपालको राजनीतिमा गम्भीर भूमिका खेल्नुपर्ने समयले माग गरिरहेको दाबी गरेका छन् ।

पार्टी निकट आदिवासी जनजाति महासंघको दोस्रो राष्ट्रिय महाधिवेशनलाई शनिबार सम्बोधन गर्दै आफ्नो पार्टी अरू कुनै पार्टीमा गएर विलीन हुने जिकिर गरे ।

उनले भने, ‘हामीले अरू वामपन्थी शक्तिहरूलाई पनि गोलबन्द गर्नुपर्छ । गोलबन्द हुन चाहनेहरूलाई हामी एकताबद्ध बनाउँछौँ । विभिन्न व्यक्तिहरू हाम्रो पार्टीमा आउन चाहनुभएको छ । आर्इ पनि रहनुभएको छ । त्यसैगरी अरूलाई पनि ल्याइरहेका छौँ, तर हाम्रो पार्टी अर्को पार्टीमा गएर विलीन हुनेछैन । एमालेमा जान्छ कि भनेर कसैले सपना देखेको छ भने त्यो सपना नदेखे हुन्छ । त्यो सम्भावना छैन ।’

नेता नेपालले पार्टीका नेता कार्यकर्ताहरूलाई निष्क्रिय भएर नबस्न आग्रह गरे । उनले आफ्नो पार्टीमा जनताको मतको कमी नरहेको सुनाए ।

उनले अगाडि भने, ‘अस्तिमात्रै पनि म कालीकोट पुगेर आएँ, कर्णालीका विभिन्न जिल्लाहरूमा पनि हजारौँ मान्छेहरूको जुलुस र सहभागिता देखेँ । रौतहट र सप्तरीमा पनि यस्तै सहभागिता थियो । तराई, पहाड र हिमालमा पनि अगाडि बढेको छ । त्यसैले अरू पार्टीभन्दा शक्तिशाली बनाउन जुट्नुपर्छ।’

नेता नेपालले पार्टीको शक्ति बढेको दाबी गर्दै राष्ट्रिय पार्टी बन्न कुनै गाह्रो नहुने बताए ।