काठमाडौं । टेक्सस राज्यको उत्तरी भागबाट पक्राउ गरेर थुनामा राखिएका भेनेजुएलीहरुलाई डिपोर्ट गर्ने अमेरिकी राष्ट्रपति डोनाल्ड ट्रम्पको योजनामा तत्काललाई सर्वोच्च अदालतले अङ्कुश लाएको छ ।
बेलायती विश्व च्यानल बीबीसीका अनुसार ग्याङ सदस्य भनेर पक्राउ गरिएका उनीहरूलाई डिपोर्ट नगर्ने आदेश दिइएको छ । उनीहरूको पक्राउमा १८ औँ शताब्दीको युद्धकालीन कानुन लाइएको छ ।
गत अप्रिल ८ सम्ममा अमेरिकाबाट १३७ जना भेनेजुएलीहरुलाई एल साल्भादोरको विशाल बन्दिगृहमा डिपोर्ट गरिएको छ ।
अमेरिकाले एल साल्भादोरलाई पैसा तिरेर आफ्ना अपराधीहरूलाई थुन्दै आएको छ । तर उक्त थुनामा मानव अधिकारको व्यापक हनन भएको भन्दै विश्वभर आलोचना जारी छ ।
यस अगाडि गैरकानुनी रूपमा डिपोर्ट गरिएका आब्रेगो गार्सियालाई पनि फिर्ता गर्न सर्वोच्च अदालतले आदेश दिएको छ । तर ट्रम्प सरकारले भने त्यो सम्भव नभएको जिकिर गरिरहेको बीबीसीले उल्लेख गरेको छ ।
Leave a Reply