सरकारको असहमतिको बाबजुद ओलम्पिक कमिटीको नयाँ समितिले आइओसीबाट पायो मान्यता

काठमाडौं । अन्तर्राष्ट्रिय ओलम्पिक कमिटी (आइओसी) ले नेपाल ओलम्पिक कमिटी (एनओसी) मा निर्वाचित नयाँ कार्यसमितिलाई मान्यता दिएको छ । आइओसीले पत्र लेख्दै एनओसीका नवनिर्वाचित अध्यक्ष जीवनराम श्रेष्ठ र महासविच राजीव श्रेष्ठसहितको समितिलाई मान्यता दिएको जनाएको छ ।

एनओसीले गत पुस १३ गते अनलाइनमार्फत निर्वाचन गरेको थियो । उक्त निर्वाचनमा अध्यक्षमा जीवनराम श्रेष्ठ निर्वाचित भएका थिए । एनओसी सम्बन्ध, ओलम्पिक सोलिडारिटी र ओलम्पिज्म ३६५ का डाइरेक्टर जेम्स म्याक्लोडले हस्ताक्षर गरेको पत्रमा नवनिर्वाचित एनओसीलाई मान्यता दिँदै समावेशी र एकतावद्ध रुपमा सबै सदस्यहरुसँग सहकार्य गर्न र सम्बन्धित सरकारी निकायहरुसँग ओलम्पिक चार्टर अनुसार पारस्परिक समझदारी, सम्मान र विश्वासका साथ सुमधुर सम्बन्ध पुनस्र्थापित गर्न आग्रह समेत गरिएको छ ।

नेपाल सरकारले भने एनओसीको निर्वाचनलाई अवैधानिक ठहर गरेको छ । सर्वोच्च अदालत र सरकारको निर्देशनविरुद्ध एनओसीले अनलाइनबाट निर्वाचन गरेको सरकारको दाबी छ । सरकारले एनओसी अवैधानिक भएको भन्दै मान्यता नदिन आइओसीलाई पत्राचारसमेत गरेको थियो । यसअघि नै राष्ट्रिय खेलकुद परिषद् (राखेप) ले एनओसीको भवनमा तालाबन्दी गरिसकेको छ ।