काठमाडौं । चलचित्र ‘भूठान’को ट्रेलर सार्वजनिक गरिएको छ । मंगलबार एक कार्यक्रमका बिच निर्माण टिमले ‘भूठान’को ट्रेलर सार्वजनिक गरेको हो ।
तीन मिनेट लामो ट्रेलर सामाजिक कथावस्तुमा आधारित छ। ट्रेलरमा अमेरिका पुगेका भुटानी शरणार्थीको कथा छ । वृद्ध अवस्थामा अमेरिका पुगेका एक व्यक्तिले भुटान फर्किन गरेको प्रयास ट्रेलरमा देख्न सकिन्छ। पराइ भूमिमा भौतिक सुख प्राप्त भए पनि धर्म, संस्कार र संस्कृति नमिल्दा त्यसले पार्ने प्रभाव ‘भूठान’ले ट्रेलरमा देखाएको छ ।
अंग्रेजीमा ‘द वल्र्डस् ह्याप्पिएस्ट म्यान’ नाम रहेको यो चलचित्रको मुख्य भूमिकामा हरिवंश आचार्य छन् । हरिवंशसंगै चलचित्रमा दयाहाङ राई, अनुराधा मजुमदार, पूजा चन्द–लामा, रिचा घिमिरे, जोएस पाण्डे, अदिति प्याकुरेल, टम क्रेन र विमल सुवेदीको अभिनय छ । हलिउडका अभिनेता बु्रस डर्नले पनि यो चलचित्रमा विशेष भूमिकामा अभिनय गरेका छन् ।
हलिउडको साग अफट्रा अन्तर्गत रहेर बनेको यो पहिलो नेपाली चलचित्र हो जसमा हलिउडका केही प्राविधिकहरुले पनि काम गरेका छन् । चलचित्र यहीँ वैशाख १२ गतेबाट रिलिज हुँदैछ। विनोद पौडेलको निर्देशन रहेको ‘भूठान’का निर्मातामा अविरल थापा, सुशांक मैनाली, राजेन्द्र ठकुराठी, अमिताभ जोशी र किर्तना बाँस्कोटा हुन। चलचित्र सुसन प्रजापतिले खिचेका छन् ।
चलचित्रमा विकाश भिटो अधिकारी, कौशिला खनाल, रमेश भट्ट र अपार श्रेष्ठको कार्यकारी निर्माण, अन्जय खड्का सम्पादन र समवरण केमको संगीत छ।
Leave a Reply