‘कर्मा’ हेरेपछि दुर्गेश- विपीन कार्कीको एक्सन हेर्न भए पनि दर्शक आउनुपर्छ, उहाँको एक्सन बबाल छ

काठमाडौं । अभिनेता विपीन कार्की अभिनित चलचित्र ‘कर्मा’ यतिबेला प्रदर्शनमा छ । हिजोबाट यो चलचित्र देशव्यापी प्रदर्शनमा आएको हो । चलचित्र हलमा लागेसँगै चलचित्रको टीम अहिले हल भिजिटमा व्यस्त छ । दर्शनसँग प्रत्यक्ष साक्षात्कार गर्न विपीन र यसै चलचित्रकी नायिका उपासनासिंह ठकुरी हलहल दौडिरहेका छन् ।

चलचित्रमा विपीनको एक्सन देख्न सकिन्छ । यसअघि उनी कुनै चलचित्रमा पनि एक्सन अवतारमा देखिएका थिएनन् । उनको एक्सन हेर्न भए पनि दर्शक हल पुगिरहेका छन् । उनको एक्सन हेर्न गायक दुर्गेश थापा पनि हल पुगेका छन् ।

चलचित्र हेरेपछि उनले भने, ‘खासमा म आज विपीन दाइको एक्सन हेर्न भनेर आएको हो । दाइको कमेडी त पहिलेदेखि नै हेर्दै आएको हो, तर एक्सन कस्तो रहेछ भनेर हेर्न आएको थिएँ । बबालै लाग्यो ।’

विपीनको एक्सन हेर्न भए पनि दर्शक हलसम्म आउनुपर्ने दुर्गेशले बताए । ‘फिल्म राम्रो छ । गीतदेखि लिएर सबै पक्ष राम्रो छ । यदि यो चलचित्रलाई रेट गर्नुप¥यो भने म १० मा १० दिन्छु’, दुर्गेशले भने ।

दुर्गेश र दर्शकको प्रतिक्रिया सुनेपछि आफूलाई खुसी लागेको विपीनले बताए । उनले भने, ‘एकदम खुसी लागेको छ । उत्साहजनक साथ दिनुभएको छ । म आफैं पनि बिहानदेखि दर्शकहरुसँग बसेर फिल्म हेरिरहेको छु ।’

आज शनिबार सार्वजनिक बिदा भएकाले पनि दर्शकहरु चलचित्र हेर्न हल पुगिरहेका छन् । पहिलो दिन सुखद प्रतिक्रिया पाएको यो चलचित्रको आजको अकुपेन्सी हिजोको भन्दा केही राम्रो छ ।

चलचित्रमा दुर्गेशले गाएको गीत पनि समावेश छ। ‘कर्मा’मा विपीन कार्की, उपासनासिंह ठकुरी, मुकुन भुसाल, दिव्यदेव, सरिता गिरी, बेन बस्नेत, सुज्यान सिलवाल, अनिल बुढाथोकी, निर्मल शर्मालगायतको अभिनय छ ।

सौरभ चौधरीले निर्देशन गरेको ‘कर्मा’को कथा पनि चौधरी आफैंले लेखेका छन् ।

चलचित्रमा भाष्कर स्वाँरको संगीत निर्देशन, कविराज गहतराजको कोरियोग्राफी, श्री श्रेष्ठको द्वन्द्व निर्देशन र निमेष श्रेष्ठको सम्पादन छ। तारानाथ न्यौपाने मुख्य सहायक निर्देशक रहेको चलचित्रमा समीर मियाको भीएफएक्स, उत्तम न्यौपानेको व्याकग्राउन्ड स्कोर, शाहिल खानको टिजर–ट्रेलर र विजय बस्यालको पब्लिसिटी डिजाइन छ । आर्टिस्टिक इन्टरटेनमेन्टको प्रस्तुति रहेको ‘कर्मा’ मा वसन्त लम्सालको लगानी छ ।