सौगात मल्ल र अनुपबिक्रम शाही स्टारर् चलचित्र ‘जार’ को ट्रेलर सार्वजनिक (भिडियो)

काठमाडौं । आगामी वैशाख २६ गतेबाट प्रदर्शनमा आउन लागेको चलचित्र जारको ट्रेलर सार्वजनिक भएको छ । निर्माण कम्पनी फेरी टेल पिक्चर्सले बिहीवार राजधानीमा एक कार्यक्रम गर्दै चलचित्रको ट्रेलर सार्वजनिक गरेको हो।

साहित्यकार इन्द्रबहादुर राईको ऐतिहासिक कथामा आधारित यो चलचित्रको ट्रेलर रिलिजसँगै प्रचारप्रसार पनि सुरु गरिएको छ। सार्वजनिक ट्रेलरमा अभिनेताद्वय सौगात मल्ल र अनुपबिक्रम शाहीसँगै अभिनेत्री गीताञ्जली थापाले प्रमुख स्थान लिएका छन् । चलचित्र सन् १८ सयको दशकमा नेपाली समाजमा घटेको यथार्थ घटनामा आधारित छ।

ट्रेलर सार्वजनिक कार्यक्रममा बोल्दै निर्देशक फुर्वा छिरिङ लामाले एक ऐतिहासिक कृतिलाई पर्दामा उतार्न पाउनु आफैमा गर्वको कुरा रहेको बताए। उनले भने,‘जारको कथालाई अन्याय हुन दिएका छैनौं। यो कथा पर्दामा उतार्नु आफैमा एक चुनौती हो। इन्द्रबहादुर राईको भावना र मर्मलाई उच्च सम्मानसहित हामीले ,जारु तयार गरेका छौं।’

कार्यक्रममा बोल्दै सौगात र अनुपबिक्रमले पनि एउटा इतिहासको साक्षी बस्न पाएकोमा गर्व महशुस गरेको बताए ।

चलचित्रको शीर्ष भूमिकामा सौगात मल्ल, अनुपबिक्रम शाही र भारतीय राष्ट्रिय चलचित्र पुरस्कार विजेता अभिनेत्री गीताञ्जली थापा छन् । ‘लायर्स डाइस’बाट उत्कृष्ट अभिनेत्री विधामा भारतको राष्ट्रिय अवार्ड जितेकी गीताञ्जली अभिनित चलचित्र टोरन्टो, बुसान, लस एन्जलस, न्युयोर्क लगायतका चलचित्रहरु फेस्टिभलमा स्क्रिनिङ भइसकेका छन् । नेटफ्लिक्स सिरिज ‘सेक्रेड गेम्स’मा पनि गीताञ्जलीले अभिनय गरेकी छिन् ।

यो चलचित्रको सम्पूर्ण छायांकन सिक्किममा गरिएको छ । होप रिल्स, एलए सेभेन सर्ट्स, बराल स्टुडियो र किवा प्रोडक्सनको सहकार्यमा निर्माण भएको यो चलचित्रको कार्यकारी निर्मातामा नीरज राई, नुर्साङ भुटिया, ज्योती क्षेत्री र पेमा रिन्जिङ लेप्चा छन् ।

सरवानन इलावार्सुको छायांकन रहेको चलचित्रमा अखिलेश राईको सम्पादन छ । चलचित्रलाई नेपालभित्र एप्पल इन्टरटेन्मेन्ट, रीच इन्टरटेन्मेन्ट र एफडी कम्पनिले वितरण अधिकार लिएका छन् भने अन्तर्राष्ट्रिय वितरणको जिम्मा सेभेन सिज सिनेमाले लिएको छ । डिजिटल पार्टनरको रूपमा ओएसआर डिजिटल जोडिएको छ ।