विराटनगर । नेकपा एस कोशी प्रदेशको अध्यक्षमा सरिता खड्काको नाम घोषणा गरिएको छ । मंगलबारबाट सुरू प्रदेश अधिवेशनबाट उनको नाम घोषणा गरिएको हो ।
सरिता यसअघि उपसचिव थिइन् । २०७४ मा समानुपातिक प्रदेशसभा सांसद भएकी उनी ७९ को चुनावमा भने संखुवासभा १ (१) मा पराजित भइन् ।
कोशीको अध्यक्ष बन्न ५ जनाले मनोनयन दर्ता गराएका थिए । महेश रेग्मी, उपाध्यक्ष धर्म निरौला, केशवकुमार विष्ट र विनोद खड्काले उम्मेदवारी दिएका थिए । तर, सर्वसम्मतका नाममा खड्कालाई टीका लगाइएको भन्दै अन्य आकांक्षी र प्रतिनिधिले असन्तुष्टि जनाएका छन् ।
अध्यक्षका दाबेदार धर्म निरौलाले सर्वसम्मतका नाममा सबै प्रतिनिधिलाई घर पठाएर अध्यक्षमा खड्काको नाम सुनाएको टिप्पणी गरे ।
उनले भने, ‘हिजै हामीले निर्वाचन गराऊ भनेका थियौं । सर्वसम्मतको प्रयास गरौँ भन्दै अध्यक्ष मण्डलले आजसम्म राख्यो । बिहान सबैलाई घर पठाएपछि उहाँहरूले घोषणा गर्नुभयो । प्रतिस्पर्धालाई रोकेर टीको लगाइयो ।’
आफ्नो पक्षमा ७० प्रतिशत प्रतिनिधि भएको भन्दै निरौलाले हिजो भोटिङ भएको भए आफूले जित्ने दाबी गरे ।
निरौलाले भने, ‘बिहान सबैलाई घर पठाएर अध्यक्ष मण्डलले घोषणा गर्ने अधिकार लिनुभयो । मैले मेरो कुरा राखेर हलबाट निस्किएँ ।’
‘सर्वसम्मत चयन गर्ने छलफल डाक्नुभयो । पार्टी बनाउन केन्द्रीय सदस्य, पोलिटब्युरो सदस्य छाडेर आएको हुँ । उपाध्यक्ष भएको नाताले अध्यक्ष हुने पालो मेरो हो भन्दै दाबी गरेको थिएँ ‘, निरौलाले गुनासो गरे ।
कल, छल, बल र आलटाल गरेर टारेको उनको भनाइ छ । सबै प्रतिनिधिलाई घर पठाएर २ सय प्रतिनिधि भएपछि चुनाव गरौँ भनिएको उनले जिकिर गरे ।
नेकपा एस कोशीको अधिवेशनको नयाँ नेतृत्व चयनका लागि गठित अध्यक्ष मण्डलको अध्यक्ष राजेन्द्र राई थिए । पूर्वमुख्यमन्त्रीसमेत रहेका राई पार्टीका उपमहासचिव हुन् । अध्यक्ष मण्डलको राजन राई, जीवन राई, खिनु लंगवा, अशेष घिमिरे र विद्या चाम्लिङ थिए ।
उपाध्यक्षको नाम भने घोषणा भइसकेको छैन । सचिवमा जलेश्वर राईको नाम पढिएको छ । उपसचिवमा भवानी शंकर विक दलित तर्फबाट हिजै सर्वसम्मत भएका थिए । खुल्लातर्फ भने छिरिङ लामाको नाम हलमा सुनाइएको छ । महिला उप सचिवको नाम घोषणा हुन बाँकी छ । महिला उपसचिवमा सिर्जना लामा, विक्रमी चौधरी र मिरा दाहालले उम्मेदवारी हालेका छन् ।
अध्यक्षका अर्का दाबेदार महेश रेग्मी सम्पर्कमा आउन चाहेनन् । उनले पनि भोटिङको माग राख्दै आएका थिए ।
Leave a Reply