घरको छतमा चढेर आमसभा हेर्नेहरूप्रति चनाखो हुन राप्रपाको घरधनीहरूलाई आग्रह

काठमाडौं । राष्ट्रिय प्रजातन्त्र पार्टीले बल्खुमा आफ्नो सभास्थल नजिक रहेका घरधनीहरूलाई चनाखो रहन आग्रह गरेको छ । आमसभा हेर्न भनेर घरको छतमा चढेकाहरु घुसपैठिया पनि हुन सक्ने भन्दै पार्टीले सो आग्रह गरेको हो ।

आमसभाका क्रममा कार्यक्रमका उद्घोषकले भने, ‘यहाँ घरको छतहरूबाट कार्यक्रमलाई हेरिरहेको भन्ने सूचना आएको छ । घरको छतमा बसेर हेर्नेहरू घरकै सदस्य हो होइन, घुसपैठिया पनि हुन सक्छ । त्यसैले सतर्कता अपनाउन अनुरोध गर्दछौं ।’

गत चैत १५ गते तीनकुनेको आन्दोलनमा प्रहरीले घरको छतबाट सभास्थलमा अश्रुग्यास प्रहार गरेको आरोप आन्दोलनकारीहरुले लगाउँदै आएका छन् । सोही आरोपमा थुप्रै घरमा तोडफोड र आगजनीसमेत गरिएको थियो ।