श्रीलंका र बंगलादेशको उदाहरण दिँदै उपेन्द्रको चेतावनी- दुई तिहाइको दम्भ नदेखाउनू (भिडिओ)

काठमाडौं । जसपा नेपालका अध्यक्ष उपेन्द्र यादवले सरकारलाई श्रीलंका र बंगलादेशकाे उदाहरण दिँदै दुई तिहाइ शक्तिको दम्भ नदेखाउन चेतावनी दिएका छन्।

मधेश केन्द्रित ७ दलीय संघीय लोकतान्त्रिक मोर्चा घोषणा सभालाई सम्बोधन गर्दै जनता लागेपछि दुई तिहाइ सरकारको केही नलाग्ने बताए।

उनले भने, ‘प्रतिनिधि सभामा दुई तिहाइको सङ्ख्याले बलियो सरकार छ। तर सङ्ख्याले बलियो हुँदो रहेनछ। बङ्गलादेशमा दुई तिहाइको सरकार कता गयो गयो ? जनताहरू उठेपछि, त्यसै गरी श्रीलंकामा बहुमतको सरकारले भाग्दा कट्टु सम्हाल्न समेत पाएन। सरकार त्यो बलियो हो जसले संघीय लोकतान्त्रिक गणतन्त्रलाई कार्यान्वयन र रक्षा गर्नसक्छ।’

उनले यो सरकार बनेपछि भ्रष्टाचार नियन्त्रण हुन नसकेकोदेखि देशको आर्थिक सुधार आउन नसकेको बताए।

उनले थपे, ‘संविधान संशोधन गर्छु भनेर आएको प्रधानमन्त्रीले २०८७ मा गर्छु भन्ने, जबकि यो सरकार ०८४ सम्म मात्रै चल्छ। त्यसैले यो सरकार अहिले कमजोर छ। भ्रष्टाचार बढिरहेको छ। लुटतन्त्र र विचौलियातन्त्रले जनतामा आक्रोश छ। यही मौकामा प्रतिगमनकारीहरूले संघीय लोकतान्त्रिक गणतन्त्रलाई सिद्ध्याउन खोज्दैछन्।’