रुस र युक्रेन काल सागरमा युद्धविराम गर्न सहमत

काठमाडौं । अमेरिकी राष्ट्रपति डोनाल्ड ट्रम्पको शान्ति मिसनअनुसार रुस र युक्रेनले काल सागरमा युद्धविराम गर्ने सहमति गरेका छन् । बेलायती विश्व च्यानल बीबीसीका अनुसार साउदी अरबमा भएको तीन दिने शान्ति वार्तापछि उक्त सहमति भएको हो ।

‘दिगो शान्तिको लागि’ सबै पक्षले काम जारी राख्ने अमेरिकाले बताएको बीबीसीले उल्लेख गरेको छ । युक्रेनका राष्ट्रपति भोलोदोमिर जेलेन्स्कीले काल सागरको युद्धविरामले सकारात्मक दिशा दिएको बताएका छन् । रुसी राष्ट्रपति पुटिनबाट यसबारेमा सार्वजनिक प्रतिक्रिया आइसकेको छैन ।

सन् २०२२ फेब्रुअरी अन्तिम हप्ताबाट युक्रेनमा रुसले सैन्य हमला गरेको थियो । युद्धमा युक्रेनको पक्षमा अमेरिका, युरोप तथा अरु अमेरिकी धुरीका देशहरुले साथ दिँदै आएका थिए, तर अमेरिकामा राष्ट्रपति चयन भएर आएका ट्रम्पले रुससँग समन्वयको नीति लिएर युद्धको पल्ला युक्रेनको पक्षमा होइन, रुसको पक्षमा पारिदिएका छन् ।