चीनकाे राजकीय अनुसन्धानका गोप्य सूचना विदेशीलाई बेच्ने अन्वेषकलाई दिइयो मृत्युदण्ड

काठमाडौं । चीनले अनुसन्धानका गोप्य सूचना विदेशी शक्तिलाई बेच्ने एक अन्वेषकलाई मृत्युदण्डको सजाय दिएको छ । बेलायती विश्व च्यानल बीबीसीका अनुसार बुधबार चीनको राज्य सुरक्षा मन्त्रालयले ती पूर्वअन्वेषकले राज्यका गोप्य सूचनाहरु विदेशीलाई बेचेकाले त्यस्तो सजाय भएको उल्लेख गरेको छ ।

ती अन्वेषकले आफूलाई संस्थानमा राम्रो नगरिएको भन्दै कार्यालय छोड्नु अगाडि गोप्य सूचनाहरु सुरक्षित गरेका थिए । पछि उनले विभिन्न लगानीहरु गरे, तर सबैमा असफल भए ।

अनि ती गोप्य सूचना विदेशी एजेन्टलाई ‘कौडीको भाउमा’ बेचे । र, अहिले यही कसुरमा उनलाई मृत्युदण्डको फैसला सुनाइएको बीबीसीले उल्लेख गरेको छ ।

तर उनको पूरा नाम सार्वजनिक भएको छैन । ती व्यक्तिको थर चैँ लिउ भएको बताइएको छ ।