क्राइमियालाई रुसी भूभागको मान्यता दिन अमेरिका तयार

काठमाडौं । जनमतसंग्रहबाट रुसमा गाभिएको युक्रेनको क्राइमियालाई रुसी भूभाग मान्न अमेरिका तयार देखिएको छ । अमेरिकी मिडियाले यस्तो जानकारी दिएको रुसी विश्व च्यानल आरटीले उल्लेख गरेको छ ।

आरटीका अनुसार अमेरिकाले चाँडै मान्यता दिने र त्यसो गर्न संयुक्त राष्ट्रसंघलाई पनि दबाब दिने बताइएको छ । सन् २०१४ मा जनमतसंग्रह दाबी गरिएको एक मतदानबाट क्राइमिया रुसमा गाभिएको थियो ।

युक्रेन र रुस तनावको समयमा रुसी भाषी बाहुल्य भएको उक्त सामुद्रिक टापु क्षेत्र रुसमा गाभिएको थियो । आफूमा गाभिएसँगै रुसले क्राइमिया जोड्ने सीधा सामुद्रिक पुल बनाएको थियो । उक्त पुलमा युक्रेनले पटकपटक हमला गर्दै आएको छ ।

सन् २०१४ मा क्राइमिया रुसमा गाभिए पनि अमेरिका, यूरोप तथा विश्वका अरु धेरै देशले यसलाई मान्यता दिएका छैनन् ।