काठमाडौं । सत्तारुढ दल नेपाली कांग्रेसका महामन्त्री विश्वप्रकाश शर्माले नेपाल विद्युत प्राधिकरणका कार्यकारी निर्देशक कुलमान घिसिङलाई हटाउने विषयमा सरकारलाई संयम भएर चल्न सुझाव दिएका छन्।
सरकारले कुलमानलाई हटाउन पटक पटक स्पष्टीकरण सोधिरहेको बेलामा महामन्त्री शर्माले असन्तुष्टिको भुँग्रोमा घिउ थप्ने काममा सरकार लाग्न नहुने बताए।
उनले कुलमानको विषय मात्रै नभएर पूर्वविशिष्टलाई आजीवन सुविधा दिने सरकारको तयारीको पनि विरोध गरेका छन्। उनले पूर्वविशिष्टलाई आजीवन सुविधा दिने विधेयक नै नआउने बताए।
उनले भनेका छन्, ‘आर्थिक भार थप्नेगरि आए त्यो पारित हुने छैन सटिक र क्लियर कट कुरा यत्ति हो १ असन्तुष्टिको भुँग्रोमा घिउ थप्न सरकार स्वयं लाग्नुहुन्न १ पूर्व विशिष्टलाई सुविधा थप्ने प्रश्न होस् या विद्युत प्राधिकरणको एमडी हटाउने प्रकरण, सरकार संयमले चल्नुपर्छ १’
बेथिति नियन्त्रण, पद्धति सुदृढीकरणमा लोकतान्त्रिक मिडिया पनि सचेत रहनुपर्ने बताए। मन्त्रिपरिषद्को निर्णय अनुसार कुलमानलाई हटाउन उर्जामन्त्री दीपक खड्काले स्पष्टीकरण सोधेपछि कांग्रेस अर्का महामन्त्री गगन थापाले पनि असन्तुष्टि जनाएका थिए।
उनले सिन्धुली पुगेर भनेका थिए, ‘अहिले हामी सुनिरहेका छौँ, ऊर्जा मन्त्रालयको। मन्त्रालयअन्तर्गत विद्युत् प्राधिकरण छ। मैले बुझ्न सकेको छैन, बदनियत हो कि ढंग नपुगेको हो। तीन–चार महिनामा सेवा निवृत्त हुने एउटा व्यक्तिपछि सरकार नै लागेको देखिन्छ। यस्ता कुरा ठिक होइन। यस्तो, नचाहिने काममा कोही पनि मन्त्रीहरू लाग्नु हुँदैन।’
Leave a Reply